The Definitive Guide to Living in the Capital , Cairo , Egypt

واضح أن صيف 2018 هيشهد تنافس كبير بين مجموعة من أفلام الأبطال الخارقين. لكن هل كلها هتكون أفلام مميزة؟ الحقيقة مش متأكدين.. لكن على الأقل معانا فيلم متميز وهو Ant-Man and the Wasp.

في الجزء الجديد من سلسلة Ant man واللي بيحمل إسم Ant-Man and the Wasp بنشوف بطلنا سكوت لانج اللي بيقوم بدوره بول رود واللي بيحاول يوازن بين كونه أب مسئول عن أسرة، وبين أنه بطل خارق. ودي معادلة صعبة، خصوصًا لما يتم تكليفه بمهمة جديدة فيها مخاطر كبيرة وسلسلة لا تنتهي من مشاهد الأكشن.

مخرج الفيلم بيتن ريد كان مُخلص تماما لفكرة الإبهار في كل مشهد، وأنه يستعين بالتقنيات الحديثة علشان يلعب على فكرة الأحجام وتنافرها أو تناسقها مع بعضها البعض. ودي الفكرة اللي بتقوم عليها السلسلة بالكامل من خلال حكاية بطل خارق مهارته الحقيقية بتتمثل في قدرته على تقليص حجمه.

تأليف كريس ماكينا واريك سومرز ساعد بشكل كبير على إظهار النواحي الإنسانية عند سكوت لانج، ويمكن الجانب الإنساني ده مش بيتم تناوله بالأهتمام الكافي في أفلام الأبطال الخارقة بشكل عام على حساب مشاهد الأكشن. علشان كده بنعتبر فيلم Ant man نجح في التحدي ده.

زي ما قولنا إخراج مشاهد الأكشن والمطاردات كان متميز. لكن بعض المشاهد كانت سريعة جدًا بحيث كنا بنشعر ببعض التوهان وعدم القدرة على ملاحظة اللي بيحصل في الكادر. لكن بشكل عام نقدر نقول إننا شوفنا مجموعة من مشاهد الأكشن والمطاردات المميزة، خاصة مع الموسيقى التصويرية الحماسية واللي ساعدت على دخولنا جو الأحداث.

فيلم Ant-Man and the Wasp مش أفضل فيلم أبطال خارقين شوفناه، لكنه بالتأكيد فيلم متميز، وقادر على المنافسة وإثبات نفسه في سوق الأفلام الناجحة.

علشان تبقى عارف: تقييم الفيلم على موقع IMDB وصل لـ 7.7 من 10، وده بيعتبر تقييم متميز إلى حد كبير.