The Definitive Guide to Living in the Capital , Cairo , Egypt

كل أبناء الثمانينيات والتسعينيات فاكرين سلاسل الأفلام اللي شارك فيها بطل ألعاب القتال المختلط بروس لي، واللي بيمثل أسطورة في المجال ده واسم لا يمكن هزيمته على مدى العصور. لكن قبل ما نشوف الأفلام دي شخصية بروس لي الحقيقية مرت بكتير من الاختبارات قبل ما توصل للشهرة والعالمية. فيلمنا عن الفترة دي في حياة بروس لي.

القصة

الفيلم بتدور أحداثه في مدينة سان فرانسيسكو في الستينيات، واللي بتدور فيها قصة صعود بروس لي كبطل في لعبة الكونغ فو وحتى لقاؤه الأسطوري ببطل اللعبة وونج جاك مان واللي كان أيامها أسطورة لا تقهر في اللعبة.

فريق العمل

الفيلم من إخراج جورج نولفا ومقتبس عن مقال كتبه مايكل دورجان عن بروس لي، وكتب سيناريو وحوار الفيلم كريستوفر ويلكنسون أما البطولة فكانت لـ  بيللي ماجنوسين وتيري تشن وفيليب نج وإن لونج وتيريزا نافارو وفانيسا روس ورون يوان.

الأداء التمثيلي

على الرغم من عدم وجود شبه كبير بين ملامح فيليب نج وإن لونج وبين بروس لي، إلا أن فيليب قدر يتقمص روح بروس لي وينقل لنا كتير من المشاهد اللي بيظهر فيها بنفس روحه وأسلوبه في الكلام والحركة وده طبعًا يحسب له، لكن من السىء في الفيلم عدم الاهتمام بالأدوار الجانبية والاهتمام فقط بشخصية بروس لي وكيفية ظهوره واهتمام الكاميرا والإضاءة وباقي عوامل إخراج الفيلم به وعدم تسليط كثير من الضوء على باقي أبطال الفيلم.

السيناريو والحوار والإخراج

سيناريو الفيلم اعتمد بشكل كبير على المشاهد القتالية بين الأشخاص، وده طبعًا مفهوم في فيلم بيناقش قصة حياة بروس لي، لكن كنا نتوقع تسليط بعض الضوء على الحياة الإنسانية والاجتماعية لبروس لي، لكن ده تم تناوله في إطار ضيق ودون التركيز على العوامل الإنسانية والحياتيه في حياة بروس لي.

إخراج الفيلم كمان متميز في مشاهد الحركة والاشتباك والمعارك اليدوية وقدر يخرجها بشكل جيد، وبشكل عام إخراج الفيلم قام باللي عليه ومطلوب منه بالضبط وده شيء يستحق الإشادة.

الديكورات والموسيقى والأزياء

على الرغم من قدرة الفيلم على تقديم ديكورات أفضل وأزياء أفضل إلا إن صناع الفيلم التزموا بالحقبة الزمنية اللي بتدور فيها الأحداث، وفي النهاية قدروا يقدموا لنا أزياء وديكورات متماشية مع الفترة دي، خاصة الأضاءة اللي لعبت دور مهم علشان نشعر كأننا بنتفرج على أحداث من الماضي.

لكن للأسف كنا نتوقع الأفضل من الموسيقى التصويرية واللي كان لازم يكون فيها مسحة صينية أو شرق أسيوية أكتر من ما شوفنا، لكن في النهاية الموسيقى التصويرية كان بيشوبها الإهمال وعدم الاهتمام من صناع الفيلم.

الخلاصة

فيلم Birth of the Dragon مستمد من أحداث حقيقية وهيعجب كل محبي أفلام الأكشن والقتال والصراع اليدوي.

علشان تبقى عارف:

بروس لي (27 نوفمبر 1940 – 20 يوليو 1973) من أشهر لاعبي الكونج فو في العالم ولد في الحي الصيني في مدينة سان فرانسيسكو وأظهر تميز رائع في لعبة الكونج فو أهلته للوصول لأعلى النتائج فيها واقتحام عالم السينما والفن من أوسع أبوابه. ثم توفي في سن صغير (حوالي 35 سنه) في ظروف بيقال أنها غامضة.