The Definitive Guide to Living in the Capital , Cairo , Egypt

الأفلام اللي بتحكي عن مجموعة من الأصدقاء الرجال اللي بيمروا بمواقف كوميدية أو تراجيدية، من الأفلام المشهورة والمعروفة في تاريخ هوليوود. أفلام زي Wilds Hogs أو Last Vegas وغيرها من الأعمال.

لكن واضح أن الجنس اللطيف مش هيسكت على الموضوع ده. ومؤخرًا بدأنا نشوف أفلام بتجمع مجموعة من السيدات على مهمة واحدة أو في سلسلة من المواقف الدرامية وحتى الكوميدية زي Ocean Eight اللي كان بيحكي عن مجموعة من السيدات اللي بيخططوا لسرقة مشتركة.

فيلم Book Club بيحكي عن مجموعة من السيدات بيجتموا لقراءة رواية جديدة كل فترة. العادة الجميلة دي خليتهم يتعرفوا على كتاب جديد هو الرواية الأكثر مبيعًا Fifty Shades of Grey. ومن هنا بتتغير حياة كل الصديقات بشكل مختلف تمامًا بنشوفه من خلال أحداث الرواية.

إختيار المخرج والمؤلف بيل هولديرمان لكاست العمل في الفيلم كان قوي ومميز. بنشوف مجموعة من الممثلات كبار السن والمكانة الفنية زي ديان كيتون وجين فوندا وكاندس بيرجن وماري ستينبورجين واللي سبق وقدمت دور مميز في فيلم تاني وهو فيلم Last Vegas.

سيناريو الفيلم من السيناريوهات اللي بتسيب الأحداث تنتطلق بانسيابية وببساطة أمام المشاهد. مع إبهارنا ببعض التفاصيل الصغيرة أو الجمل الحوارية اللي بتجمع بين الكوميديا في بعض الأحيان والتراجيديا في أحيان تانية. وبشكل بيشرح ويورينا أمثلة على كتير من أنماط الحياة اللي حوالينا – بما فيها حياتنا – من خلال قصة بطلات الفيلم الأربعة.

من الأمور اللي لفتت انتباهنا في الفيلم الديكورات والموسيقى التصويرية. واللي كانت هاديه ومريحة للعين وقدمت لنا تنوع بصري جميل وجذاب للعيون بشكل متميز ولافت للنظر.

فيلم Book Club فيلم جيد وله فكرة مختلفة وجميلة. وننصح بمشاهدته في أجازة نهاية الأسبوع للناس اللي بتحب الأفلام الساخرة. وطبعًا لمحبي قراءة الروايات.

علشان تبقى عارف: التقييم العمري للفيلم بتجعله صالح للمشاهدة من سن 13 سنة أو أعلى.