The Definitive Guide to Living in the Capital , Cairo , Egypt

ياترى بتحب أسرتك الصغيرة قد إيه؟ وإيه هي التضحيات اللي ممكن تقدمها، علشان الأسرة دي تعيش بسلام بعيد عن أي تهديد؟ على الرغم من أن دي الأسئلة الأساسية اللي بيطرحها فيلم Braven، واللي إجابتها ممكن تكون بديهية عند كتير مننا، إلا إن معايشتنا لأحداث الفيلم أكسبت الأسئلة دي بعد تاني.

القصة

فيلم Braven بيحكي عن شاب بيجد نفسه في موقف لا يحسد عليه، لما بتحاول مجموعة من تجار المخدرات إنهم يقضوا عليه هو وأسرته. وبيجد نفسه المدافع الوحيد عن الأسرة دي، علشان يقدر يخرج من الموقف الصعب اللي هو فيه. هل هيقدر ينجو في النهاية أم هتقضي عليه العصابة اللي أفرادها مدربين على أعلى مستوى؟

فريق العمل

فيلم Braven إخراج لين أودينج، وتأليف توماس باس سيبات. ومن بطولة: جايسون موموا، جاريت ديلاهانت، ستيفن لانج، زان مسلارنون، وجيل واجنر.

الأداء التمثيلي

“جايسون موموا” شوفناه قبل كده في واحد من أشهر المسلسلات الأجنبية على مستوى العالم، وهو مسلسل لعبة العروش. والحقيقة أن “موموا” صدر لنا شعور أنه مجرد جسد عملاق وقوي بدون أي قدرات تمثيلية. لكن من خلال دوره في Braven، قدر يثبت أن عنده قدرات تمثيلية كتيرة، يقدر يستغلها بشكل قوي ومميز.

السيناريو والحوار والإخراج

سيناريو الفيلم بينقسم لجزئين. الأول بيستعرض لنا الحياة الجميلة اللي بتعيشها الأسرة، وبداية المشكلة اللي بيتعرضوا لها. والجزء الثاني بنشوف فيه الكفاح لحماية الأسرة. والحقيقة أن الجزء الثاني كان الرتم بتاعه أسرع وأمتع من الأول.

حوار الفيلم كان مكتوب كويس قوي، والإخراج قدر يوظف العوامل دي كلها، علشان يقدم لنا في النهاية عمل قوي. على الرغم من قلة الميزانية اللي بيتحرك فيها.

الديكورات والموسيقى والأزياء

الفيلم استغل المناخ البارد علشان يقدم لنا مجموعة من المَشاهد، اللي ممكن تجمد الدم في عروق أي مُشاهد. كمان الموسيقى التصويرية الخاصة بالفيلم ساعدتنا نعيش جو الترقب والأثارة، اللي كان بيزيد مع كل مشهد. ودي كانت واحدة من الأمور اللي تحسب للفيلم وصناعه.

الخلاصة

فيلم Braven فيلم جميل عن الشجاعة من أجل حماية الأسرة، وإيه الأمور اللي ممكن تكلفها حماية العائلة.

علشان تبقى عارف:

تقييم الفيلم على موقع IMDB وصل لـ 6.5 من 10.