The Definitive Guide to Living in the Capital , Cairo , Egypt

مين أكتر جهة بتحب تتخيل سيناريوهات الكوارث للولايات المتحدة وتشتغل عليها؟ مافيش غير هوليوود! اللي واضح أن كتاب السيناريوهات فيها قرروا يتخيلوا كارثة جديدة وهي رغبة مجموعة من الولايات الانفصال عن أمريكا بدون أسباب واضحة. تعالوا نعرف أكتر عن فيلم Bushwick.

القصة

فيلم Bushwick بيحكي عن محاولة رجل وامرأة النجاة بأرواحهم بعد اندلاع مجموعة من المواجهات المسلحة بين الجيش الأمريكي ومجموعة من سكان الولايات اللي بتحاول تنفصل عن أمريكا.

على الرغم من أن القصة بسيطة والتيمة سبق وشوفناها في أفلام تانية كتير، لكن كان عندنا بعض الملاحظات على السيناريو والحوار والإخراج.

فريق العمل

فيلم Bushwick من إخراج جوناثان ميلو وكاري مورينيون ومن بطولة آنجليك زامبرانا وبريتاني سنو وكريستيان نافارو وأليكس برو وديف باتيستا.

الأداء التمثيلي

طبعًا تعتبر مشاركة المصارع الأمريكي باتيستا في الفيلم حدث مهم، وجذب مجموعة كبيرة من المشاهدين محبي عالم المصارعة علشان يتفرجوا على مصارعهم المفضل وهو بيقوم بدور تمثيلي على الشاشة. وكضيف على عالم التمثيل لازم نقول أن أداء باتيستا كان جيد، لكنه ماقدرش يخرج من جلده كمصارع ويقدم لنا أداء منفصل كممثل.

وبكده نعرف أن العبء التمثيلي بالأساس وقع على كاهل بريتاني سنو لكن هل قدرت سنو أنها تقوم بالمهمة دي؟ للأسف ماقدرتش بريتاني تقدم الأداء التمثيلي اللي كنا متوقعينه منها، على الرغم من تميزها في بعض المشاهد.

السيناريو والحوار والإخراج

من أفضل الأمور اللي عجبتنا في الفيلم السيناريو السريع واللي مش بيسيبنا ولو لحظة واحدة للشعور بالملل أو عدم الرغبة في استكمال مشاهدة الفيلم، لكن على صعيد تاني السيناريو بيسيب كتير من الأحداث بدون إجابة واضحة وده يعتبر عيب من العيوب اللي ماقدرش الإخراج يساعدنا على تجاوزها على الرغم من المجهود اللي بذله المخرج علشان يقدم لنا في النهاية فيلم ناجح وقوي.

الديكورات والموسيقى والأزياء

ديكورات الفيلم قدرت تخلق عالم كامل خاص بها، وتكاملت مع الموسيقى الحماسية واللي تم استغلالها بكل ذكاء بحيث تكون مسيطرة في المشاهد اللي بنحتاج فيها نسمع خلفية موسيقية، وتقل أو تكاد تنعدم في المشاهد اللي بتحتاج منا كل تركيز علشان نعيش تفاصيلها.

الخلاصة

فيلم Bushwick كان ممكن يكون أفضل لو كان تم الاهتمام بالسيناريو والقصة أكتر من اللي شوفناه في النهاية، ولو كان تم اختيار بطولة مساندة للمصارع باتيستا علشان توازن غياب وجود بطل للفيلم قادر على تحمل عبء الدراما.

علشان تبقى عارف:

تقييم الفيلم على موقع IMDB 5.1 من 10 وشارك في التقييم حوالي 3000 مستخدم للموقع.