The Definitive Guide to Living in the Capital , Cairo , Egypt

سلسلة Child’s Play والمعروفة في مصر باسم (تشاكي)، هي واحدة من أقدم سلاسل أفلام الرعب، ومن أكثرها قدرة على كسب جمهور جديد. يمكن لأن كلنا عندنا خوف من ألعاب الأطفال، اللي إن عيونها بتراقبنا طول الوقت.

في نسخة 2019 من Child’s Play بنشوف إعادة إصدار للفيلم، من خلال لعبة إلكترونية بيتلقاها طفل صغير عنده حوالي 13 سنة. ومع الوقت بيكتشف أن اللعبة دي مسكونة بروح شريرة، بتسعى للقتل ونشر الفزع.

المميز في النسخة الجديدة من الفيلم إنها مش بتقدم شخصية (تشاكي) كلعبة تقليدية، لكن كلعبة إلكترونية بيتم التحكم فيها من تطبيقات التليفونات الذكية. وده ذكاء من صناع الفيلم علشان يواكبو العصر.

“مارك هاميل” صاحب الأداء الصوتي لشخصية تشاكي، قدم أداء جيد جدًا. وهاميل واحد من الأصوات المميزة في هوليود. وبيعرف يوصل أي انطباع من خلال صوته بشكل محترف. كمان الأداء التمثيلي لـ “جابريل بيتمان” في دور أندي كان رائع.

لكن مشكلتنا الحقيقية مع الفيلم كانت في ميزانيته القليلة. اللي خلت مشاهد الرعب ضعيفة ومعتمدة على تكنيكات قديمة، مش مجدية قوي دلوقت. زي تكنيكات ظهور الحاجة من الضلمة فجأة. وبشكل عام حسينا أنها نفس التكنيكات القديمة اللي استعملها صناع السلسلة السابقة من الأفلام. ونسي المخرج “لارس كليفبرج” إن سنين طويلة بتفصله عن الأجزاء السابقة. سنين طويلة غيرت نمط أفلام الرعب تمامًا.

لو قارنا الفيلم بالإمكانيات والتكنولوجيا المتاحة دلوقتي، ممكن مايبقاش من أحسن أفلام الرعب الموجودة حاليًا.