The Definitive Guide to Living in the Capital , Cairo , Egypt

تحدي كبير كان قدام صناع فيلم Darkest Hour لأنهم بيناقشوا فترة تاريخية تعتبر محفوظة بالنسبة لمحبي القراءة ومشاهدة الأفلام التاريخية، ولما تكون الأحداث محروقة بحكم التاريخ، يتبقى إيه أمام المخرج والأبطال علشان يقدموا لنا تجربة غنية وممتعة؟ هو ده التحدي الأكبر أمام صناع فيلم Darkest Hour واللي هنعرف إزاي تغلبوا عليه.

القصة

الفيلم بيحكي عن فترة حاسمة في تاريخ الحرب العالمية الثانية، والفيلم بيناقش تحديدًا قرار الحرب أو السلام اللي كان على رئيس وزراء بريطانيا ونستون تشيرشل إنه ياخده مع بداية شهور الحرب. القرار اللي يعتبر واحد من أهم القرارات السياسية في العالم حتى اليوم.

فريق العمل

الفيلم من إخراج  جو رايت، ومن تأليف أنطوني مكارتن، ومن بطولة رونالد بيك أب، ليلي جيمس، جاري أولدمان، بين مينديلسون، وكريستين سكوت توماس.

الأداء التمثيلي

من وجهة نظرنا المتواضعة إحنا شوفنا أعظم أداء تمثيلي خلال العام من خلال الدور اللي قام به جاري أولدمان في دور ونستون تشرشل. والحقيقة أنه قدر ينقل لنا شعور الحيرة والشعور بأن مستقبل دولة كاملة ملقى على عاتق راجل واحد لازم ياخد قرار بشن الحرب أو الاستسلام للقوات النازية.

كمان لا يمكن ننسى الأداء التمثيلي المميز من كريستين سكوت توماس في دور كليمنتين تشرشل، واللي قدرت تجسد دور الزوجة  القادرة على الوقوف خلف زوجها ودفعه للأمام، أو حتى سحبه للخلف -للأمان- علشان يقدر في النهاية ياخد القرار المناسب والصحيح في ظروف عصيبة.

السيناريو والحوار والإخراج

سيناريو الفيلم كان قوي ومكثف ومحتاج تركيز في كل مشهد وجملة حوارية، كمان الإخراج قدر يعبر بالفيلم من نقطة صعبة وهي تقديم أحداث تاريخية معروفة للجميع لكن من وجهة نظر جديدة وشيقة أجبرتنا كمشاهدين على المتابعة من البداية للنهاية، أما الحوار فكان مميز وعلى الرغم من جدية الفيلم لكن الحوار قدر يكسر الجدية دي ببعض الهزل والتعليقات الطريفة.

الديكورات والموسيقى والأزياء

ديكورات الفيلم كانت مميزة جدًا ونقلتنا زمنيًا لفترة الحرب العالمية الثانية، كمان الموسيقى التصويرية والأزياء اللي تم اختيارها بعناية كلها لعبت دور مهم علشان ننتقل في الزمان والمكان لفترة صعبة من فترات الصراع الإنساني.

الخلاصة

فيلم Darkest Hour واحد من أفضل أفلام العام ونعتقد أنه هيكون منافس قوي وأساسي في جوائز الأوسكار.