The Definitive Guide to Living in the Capital , Cairo , Egypt

ناس كتير بتعاني من اختلال في النوم اسمه شلل النوم. والإنسان بيشعر خلاله أنه صاحي لكن مش قادر يحرك جسمه أو يتنفس بشكل صحيح كأن حد قاعد على صدره! وزمان كانوا بيسموا الظاهرة دي (الجاثوم) وكانوا بيقولوا أن السبب فيها هو الجن. ولحد النهارده بتمثل الظاهرة دي مصدر ممتاز لكتاب الرعب، وهو ده اللي بيحكي عنه فيلم Dead Awake.

القصة

فيلم Dead Awake بيحكي عن سيدة شابة بتحقق في مجموعة من الجرائم المرتبطة بناس بتشوف في أحلامها أنهم بيموتوا قبل موتهم مباشرة على أرض الواقع، وبتبدأ تربط بين ظاهرة الشلل أثناء النوم وبين حالات الوفاة، الأمر اللي بيفجر سلسلة لا تنتهي من المشاهد المرعبة والمفاجئة.

فريق العمل

الفيلم من إخراج فيليب جوزمان وتأليف جيفري ريديك وبطولة جيفري ريديك وجوسيلان دوناهو وجيسي برادفورد وبريا جرانت وبيلي بلير.

الأداء التمثيلي

على الرغم من أن كل المطلوب من أبطال الفيلم كان افتعال الشعور بالرعب وإقناع المشاهدين بيه، ثم فريق المؤثرات الخاصة يقوم بالباقي، لكن الأداء التمثيلي كان واحد من أهم نقاط الضعف في الفيلم، وحسينا إن حتى المهمة البسيطة المطلوبة من الأبطال ماقدروش يقوموا بيها على أكمل وجه. وإن الأداء التمثيلي لو كان أفضل الفيلم كان هيبقى في منطقة تانية خالص.

السيناريو والحوار والإخراج

سيناريو الفيلم كان واضح وبيعتمد على تتبع الأحداث من بدايتها لنهايتها بدون الأعتماد على الفلاش باك أو مشاهد الماضي إلا في أضيق حدود ممكنة علشان يوفر تجربة مشاهدة سلسلة للمشاهدين والحقيقة إن السيناريو نجح في ده، وتضافر معاه الإخراج علشان يقدموا لنا في النهاية تجربة مشاهدة سلسلة ومرعبة في نفس الوقت.

الديكورات والموسيقى والأزياء

الديكورات والموسيقى والمؤثرات الخاصة كان واقع عليها العبء الأكبر علشان يقدموا لنا في النهاية تجربة مرعبة وحقيقية. لكن مع الربع الأخير من الأحداث حسينا إن المؤثرات زادت عن الحد، لكن في النهاية مستوى المؤثرات الخاصة كان ممتاز وقدر يرعبنا فعلًا في أكتر من مشهد.

الخلاصة

الناس اللي بتخاف تنام لوحدها أو بتخاف من الكوابيس أثناء النوم هتحس أن Dead Awake هو أكتر فيلم مرعب في التاريخ!

علشان تبقى عارف: حقق الفيلم حتى الأن إيرادات في القاهرة تقدر بحوالي 278 ألف جنيه.