السؤال اللي طرحناه على نفسنا بعد مشاهدة الفيلم، هل ينفع نحاول ننفذ العدالة بنفسنا، ولا لازم ننتظر تنفيذها بواسطة الناس اللي ليها السلطة تعمل ده؟ ياترى أنتم إيه أجابتكم على السؤال ده؟ تعالوا نتعرف أكتر على فيلم Death Wish ونقول لكم رأينا فيه.
القصة
فيلم Death Wish بيحكي عن جراح محترف قضى حياته في محاولة إنقاذ حياة الناس، لكن الأمر بيختلف بعد تعرضه هو وأسرته لاعتداء وحشي، الأمر اللي بيخليه يقرر ينفذ القانون بنفسه وينتقم لحقه وحق أسرته. لكن هل هينجح في اللي ناوي عليه ولا هيفشل؟
فريق العمل
فيلم Death Wish من إخراج إيلي روث، وتأليف جو كارنهان، اقتباسًا عن رواية برايان جارفيلد، ومن بطولة بروس ويلس وإليزابيث شو وفينسنت دونوفريو ودين نوريس وجاك كيسي ولين كاريو.
الأداء التمثيلي
على الرغم من تقدمه في العمر إلا أن بروس ويلز قادر على تقديم أداء تمثيلي عالي ومميز جدًا، وقدر بتعبيرات وجهه وأداؤه التمثيلي أنه ينقل لنا المعاناة الداخلية لبطل الفيلم، ورغبته طوال الوقت في تحقيق الانتقام والعدالة من وجهة نظره بالشكل اللي شايفه صح، وده اللي نجح فيه بروس ويلز بالأضافة لمشاهد الأكشن اللي نجح في تأديتها بشكل مميز على الرغم من تقدمه في العمر زي ما سبق وقولنا.
السيناريو والحوار والإخراج
سيناريو الفيلم كان قوي ومحكم، لكن بيعيبه في نفس الوقت أنه مافيهوش أي تجديد أو محاولة للخروج عن الاطار التقليدي للقصة، على الرغم من أن حبكة الفيلم متشابهة مع حبكات كتير من الأفلام والقصص وكنا بنتوقع بعض التغيير أو محاولة الخروج عن الأطار التقليدي لكن ده لم يحدث وشعرنا معه ببعض الإحباط.
الديكورات والموسيقى والأزياء
ديكورات الفيلم نقلتنا بصريًا للمجتمع الأمريكي اللي بيعاني من انتشار الجريمة، كمان الموسيقى التصويرية القوية والمحكمة قدمت أداء جيد وقدرت تقنعنا بقوة كتير من المشاهد، واللي كان ممكن تكون أضعف لولا قوة الموسيقى.
الخلاصة
فيلم Death Wish بيقدم قصة عن تنفيذ العدالة، وهل ينفع ننفذ العدالة بنفسنا أم يجب انتظار العدالة بالقانون والمحاكم.. اتفرجوا على الفيلم وقولوا لنا رأيكم فيه.
علشان تبقى عارف: الفيلم بيقدم إعادة إنتاج لفيلم قديم بنفس الاسم تم تقديمه عام 1974.