The Definitive Guide to Living in the Capital , Cairo , Egypt

أفكار كتير في حياتنا المعاصرة ظهرت في البداية كمجرد أفكار خيالية في الأفلام، ومع الوقت تحولت لواقع وحقيقة بنعيشها، هل ممكن فيلم النهارده يكون إشارة لفكرة جديدة ممكن توفر كتير على البشرية؟ تعالوا نتعرف أكتر على فيلم Downsizing.

القصة

الفيلم بيحكي عن بول سافرانيك الرجل الأمريكي اللي بيعيش حياة تقليدية وهادئة، لكنه بيسمع في أحد الأيام عن عملية تقليص أحجام البشر، لتوفير مكان للحياة على الكوكب، وكمان لتوفير نفقات الحياة والقدرة على عيش حياة رفاهية بأمكانيات قليلة. وبالفعل بيخضع للعملية، الأمر اللي بيدخله في سلسلة من المواقف الكوميدية اللي مش بتنتهي.

فريق العمل

الفيلم من سيناريو وحوار وإخراج ألكسندر باين، أما البطولة فكانت لـ كريستين ويج، هونج تشاو، مات ديمون، كريستوف والتز، لورا ديرن، وجيسون سوديكس.

الأداء التمثيلي

من الواضح أن مات ديمون بيحاول يقدم تنوع طول الوقت من ناحية الأداء التمثيلي، على الرغم من تركيزه في الفترة اللي فاتت على أفلام الأكشن، لكن واضح أنه بيطرق باب أفلام الخيال العلمي والفانتازيا بقوة زي تقديمه لفيلم The Martian على سبيل المثال.

الأداء التمثيلي لباقي الأبطال كمان كان جيد جدًا، وكان واضح تركيز المخرج على أنه يخرج من كل الأبطال أقصى ما يمكن من قدرات تمثيلية، علشان يحول كل مشهد أما لمشهد جاذب للمشاهد ومثير له، أو مشهد كوميدي ومثير للخيال.

السيناريو والحوار والإخراج

سيناريو الفيلم بيتسم بالسرعة والأحداث المتلاحقة، خاصة في النصف الثاني من الأحداث، وتم توظيف المؤثرات الخاصة لخدمة قصة وفكرة الفيلم بالمقام الأول، وده في رأينا واحد من أكتر الأفلام اللي قدرت توظف المؤثرات الخاصة مش بس علشان تبهر المشاهد بصريًا، لا كمان علشان تخدم القصة وسيناريو الفيلم.

الديكورات والموسيقى والأزياء

ديكورات الفيلم لعبت دور مهم علشان نعيش داخل الأحداث، وتكاملت مع المؤثرات الخاصة في خدمة الفيلم، على العكس من الموسيقى التصويرية اللي حسينا أنها كانت ضعيفة وتستحق تكون أفضل وأقوى.

الخلاصة

فيلم Downsizing مناسب لمحبي أفلام الخيال العلمي والفانتازيا، ولمحبي أفلام مات ديمون بشكل عام.

علشان تبقى عارف:

تقييم الفيلم على موقع IMDB وصل لـ 5.7 من 10.