The Definitive Guide to Living in the Capital , Cairo , Egypt

سنة 1865 أصدر إبراهام لنكولن إعلان تحرير العبيد في الولايات المتحدة الأمريكية، ومن وقتها أصبحت تجارة العبيد ممنوعة في أمريكا. لكن، وبعيدًا عن القانون، هل تخلصت أمريكا فعلًا من التفرقة في المعاملة بين البيض والملونين؟

بداية من المشهد الأول في فيلم Emergency بنشوف اقتحام لواحدة من المناطق المحرمة في التاريخ الأمريكي، وهي العلاقة بين البيض والملونين. لدرجة إننا بنشوف مشهد طويل أثناء الدراسة في قاعات التعليم، وبنشوف إزاي بيتم تدريس تاريخ التعامل مع القضية دي بمنتهى الحساسية للطلبة.

Emergency مش بيسيبنا لوقت طويل مع معضلات أخلاقية أو إنسانية، لكنه بياخدنا لرحلة طويلة على مدار ساعتين، لمجموعة شباب ملونين بيحاولوا يعيشوا حياتهم ويحتفلوا لمدة ليلة واحدة طويلة. لكن احتفالهم بيتحول لكابوس لما بيكتشفوا وجود بنت بيضاء في حالة سُكر شديدة في نفس المكان اللي هم متواجدين فيه.

المشكلة الأساسية في الفيلم هي عدم قدرة الشباب على إبلاغ البوليس، علشان عارفين أن بوجود بنت بيضاء مع شباب ملون ومع وجود المخدرات والخمور، هيتم وضعهم في السجن واتهامهم بكل الاتهامات السيئة في الدنيا بدون تحقيق عادل أو محاولة معرفة الحقيقة. ومن هنا بتبدأ الشرارة الأولى اللي بتحرك كل الأحداث بعد كده.

Emergency مش بس بيسلط الضوء على تعامل الشرطة السيء مع الملونين، لكن حتى تعامل الناس العادية البسيطة، وكأن مجرد وجود شاب غير أبيض في سن المراهقة في مكان ما، مرادف لحدوث مصيبة أو حادثة.

الفيلم كان ممكن يكون أحسن لو كان السيناريو اعتمد على حاجات تانية غير فكرة الصدف ووجود أشخاص غير مناسبين في التوقيت/المكان غير المناسبين علشان يكون ده المحرك الوحيد للأحداث.

لكن من أحلى الحاجات اللي عجبتنا في Emergency هي فكرة اختلاف كل واحد من الأبطال، وحالة التباين بينهم، ما بين اللي عاوز يعمل لنفسه مستقبل كويس وعنده طموح، وبين اللي مش فارقه معاه وعاوز يقضيها. وهنا بتظهر رسالة الفيلم واضحة، وكأنها صرخة من مجتمع الملونين في أمريكا: إحنا مختلفين عن بعض. وفينا الكويس وفينا الوحش. بلاش تحكموا علينا بالظاهر. واعرفوا أكتر عننا!

والسؤال اللي بنختم بيه كلامنا. هل فعلًا المشكلة العنصرية في أمريكا بالحجم ده؟ ولا صناع Emergency حبوا يحطوا عدسة مكبرة على بعض التصرفات الفردية اللي بتحصل أحيانًا؟ في رأينا الشخصي، مشكلة العنصرية بالفعل كبيرة، ومحتاجة وقفة حقيقية من المجتمع الأمريكي لو بجد عاوز يتغير نفسيًا وانسانيًا.