The Definitive Guide to Living in the Capital , Cairo , Egypt

من الواضح أن الموسم السينمائي الحالي فيه أفلام كتير مثيرة للجدل. أتكلمنا من أيام عن فيلم (أصحاب ولا أعز) وحبينا نستنى شوية لحد الضجة عن فيلم Eternals ما تنتهي. علشان نعرف نتكلم عن الفيلم فنيًا. وبدون أي ضغط.

فيلم Eternals بيحكي عن مجموعة من الأبطال الخارقين، اللي بيحملوا على عاتقهم مسئولية حماية البشر من كيانات خارقة شريرة، وفي نفس الوقت بيعطوا البشر بعض أدوات تساعدهم على التطور ومواجهة تحديات الحياة ومشاكلها.

مع الوقت وتسارع الأحداث، بنعرف أنه بيتم التمهيد لإفناء البشر بالكامل لصالح ظهور شخصية جديدة بقوى لا يمكن لحد من الـ Eternals أنه يواجهها لوحده. الأمر اللي بيخليهم لازم يتحدوا ويجمعوا قواهم، ودي مش مسألة سهلة خصوصًا مع ظهور تمرد بين صفوفهم.

ممكن نقسم الفيلم لمجموعة مراحل، مرحلة التعريف بالأبطال وقواهم الخارقة، ثم مرحلة سرد تاريخ الشخصيات ورسم إطار القصة وتقديم الشرير، وأخيرًا مرحلة المواجهة بين الخير والشر وختام الأحداث.

فيلم Eternals بيحاول يقدم كل ده في حوالي ساعتين ونصف من الزمن، ودي مسألة مش سهلة. وده بسبب عدد الشخصيات الكتيرة، واللي بيحتاج كل واحد منهم لزمن لسرد الأحداث وتقديم مشاهد (فلاش باك) تعرفنا أكتر بدوره. وده أدى في النهاية لحالة من (السطحية) في تقديم المشاهد، وفي رسم الشخصيات. وفي النهاية لقينا ماعندناش تعلق معين بشخصية من اللي شوفناها، خصوصًا أن قواهم الخارقة مش مبهرة بالقدر الكافي.

طبعًا بنشوف مشاهد أكشن وجرافيك وخدع سينمائية مبهرة، لكن في النهاية ده المستوى اللي عودتنا عليه مارفل، بالتالي كنا متوقعين الاستناد على حاجه مختلفة عن الجرافيك لإبهارنا. وكنا بنراهن على الأداء التمثيلي، خاصة أننا بنتكلم على ممثلين بوزن تقيل زي سلمى حايك وأنجلينا جولي و ريتشارد مادين واللي من أشهر أبطال مسلسل Game of Thrones الشهير. لكن هل اللي راهننا عليه حصل؟

لأ للأسف! زي ما قولنا ما كانش فيه مساحة لكل شخصية أنها تظهر وتكون لها معجبين – أو حتى أعداء – وسط المشاهدين. كل شخصية تم المرور عليها بسرعة، وحتى مشاهد الفلاش باك اللي بتحكي تاريخ الشخصية كانت ضعيفة، على الرغم من أنها حاولت تجيب مشاهد وأحداث تاريخية حقيقية ومؤثرة زي تدمير ناجازاكي وهيروشيما مثلًا. وده يوصلنا لأقوى نقطة في الفيلم.

في رأينا أحلى ما في Eternals هو محاولة إعادة تقديم أصعب الجرائم اللي تم ارتكابها في حق الإنسانية، وتصوير البشر على أنهم طوال الوقت كائنات همجية بتسعى لتدمير بعضها من خلال الحروب والمجازر، لكن برغم كل حاجه لسة عندهم بريق من إنسانية، بيخليهم يترابطوا مع بعضهم وقت الكوارث.

فيلم Eternals عمل ضجة كبيرة، لكنه في النهاية كان فيه عوامل ضعف أكتر بكتير من عوامل القوة. وبننصح بمشاهدته على سبيل التسلية وتضييع الوقت بدون توقعات لما هو أكثر.