The Definitive Guide to Living in the Capital , Cairo , Egypt

محبي سلسلة Fantastic Beasts على موعد مع الجزء الثاني من نفس السلسلة. والحقيقة أن معجبي السلسلة أصبحوا بالملايين حول العالم في فترة زمنية قصيرة مقارنة بأعمال تانية بتدور في عالم الفانتازيا والخيال والسحر.

وسبب تحقيق السلسلة لنجاح كبير هيكون مفهوم لو عرفنا إن الكاتبة هي جي كيه رولينج مؤلفة سلسلة هاري بوتر. واحدة من أقوى كتاب قصص السحر والفانتازيا في التاريخ. كمان المخرج هو ديفيد ياتس مخرج سلسلة هاري بوتر. يعني باختصار إحنا أمام إعادة إنتاج لنجاح هاري بوتر لكن بميزانية أكبر وخدع أحسن وسيناريو أقوى.

الفيلم بيحكي عن جريندوالد اللي بيقوم بدوره جوني ديب، اللي بينجح في الهرب من مجلس السحرة الأمريكي، وبيبدأ ينفذ مخططه الشرير. ومن هنا بيضطر سكامندر، اللي بيقوم بدوره إيدي ريدمين، للتصدي للمخطط ومحاولة إنقاذ الأمور من التدهور أكتر من كده.

سيناريو الفيلم نجح في السيطرة على خيوط القصة الأساسية. والمحافظة على البناء الدرامي للأحداث من الجزء السابق. كمان نجح في تقديم حبكة جديدة بنفس القوانين اللي بتنتمي لعالم شديد التعقيد والثراء في نفس الوقت.

لما بنتكلم عن فيلم فيه جوني ديب وإيدي ريدمين في الأدوار الرئيسية. يبقى إحنا بنتكلم عن أداء تمثيلي من العيار الثقيل. والحقيقة أن الأداء التمثيلي للبطلين – وباقي أبطال الفيلم – كان في أفضل أحواله. على الرغم من أن طبيعة القصة بتعطي الأولوية لمشاهد السحر والخدع أكتر من تركيزها على أداء تمثيلي من الأبطال. لكن رغم كل شىء شوفنا تمثيل قوي وتركيز في كل مشهد واهتمام غير عادي بالتفاصيل.

لازم نقول أن المؤثرات الخاصة والخدع السينمائية لعبت دور مهم جدًا في الأحداث. وتنفيذ المؤثرات الخاصة كان قمة في الروعة والمصداقية. وبشكل عام كل أفلام السحر والعوالم الخيالية كانت هتفشل فشل ذريع لو مافيش اهتمام كافي بنقطة المؤثرات الخاصة والخدع. وطبعًا الديكورات نقلتنا بصريًا لعالم جميل ومختلف.

لو كنت أول مرة تشوف السلسلة ننصحك بمشاهدة الجزء الأول قبل مشاهدة Fantastic Beasts: The Crimes of Grindelwald. أما لو كنت من المتابعين.. فالفيلم بيقدم جرعة جديدة قوية وجيدة جدًا لمحبي عالم السحر والتعاويذ والأسرار الدفينة.

علشان تبقى عارف: تقييم الفيلم على موقع IMDbهو 7.2 من 10.