The Definitive Guide to Living in the Capital , Cairo , Egypt

كام مرة حسيت إن الدنيا قفلت في وشك؟ كام مرة حسيت إن كل حاجة ماشية غلط، وأن الدنيا دي عبارة عن غابة القوي فيها بياكل الضعيف بدون أي اعتبارات لأي حاجه تانية؟ لو الشعور ده متملك منك، تبقى محتاج جرعة تفاؤل تخليك تؤمن إن الأمور ممكن تبقى أحسن. وأن فرصة التغير للأحسن متاحة للجميع. ودي رسالة فيلم Father Stu.

فيلم Father Stu بيحكي عن القصة الحقيقية لستيوارت لونج، لاعب ملاكمة سابق، وشخص مش بيحركه غير شهواته، وغضبه على المجتمع، وشعوره أن كل حاجة في الدنيا لازم تتاخد بالقوة. وأنه فات زمن إقناع الناس بالحسنى، وأن المجتمع ماهو الا مستنقع كبير من كل حاجة شريرة في الدنيا!

وفي أحد الأيام – وبدون حرق أحداث- بيحصل له موقف بيغير حياته بالكامل، وبيحوله من قمة البعد عن طريق ربنا، وعن الخير بشكل عام، لشخص مسالم، بل وشخص عاوز يكون أب في الكنيسة. وده طبعًا بيحول الأحداث تحول درامي كبير مش عاوزين نحرقه عليكم.

أحلى مافي Father Stu كان الأداء التمثيلي من مارك ويلبرج. واللي ابتعد عن أفلام الأكشن الصرف اللي قدمها مؤخرًا، وكأنه بيقول لنا: أنا ممثل جامد ومش حاصر نفسي في أدوار معينة. وفعلًا رهانه كان في محله.

الفيلم كمان بيقدم لنا عودة قوية لميل جبسون، اللي قدم دور حجمه صغير نسبيًا على الشاشة، لكن تأثيره علينا كمشاهدين كان أكتر من رائع. على الرغم من الحوار في الفيلم كان مباشر زيادة عن اللازم، ومليان جمل وتعبيرات مش بتُستخدم في الحياة العادية للبشر. وكان نفسنا الحوار يكون أبسط من كده شوية، أو يسيب جزء من التخيل للمشاهد بدل تسطيح الأمور بالشكل اللي ظهر بيه.

Father Stu فيلم بيعرفنا قيمة الحياة، وأن دوام الحال من المحال، وبالتالي غلط نحكم على الناس ونصنفهم في خانات معينة علشان نريح دماغنا. بينما كل يوم بيعدي علينا هو فرصة جديدة لبداية الحياة بشكل مختلف.