The Definitive Guide to Living in the Capital , Cairo , Egypt

جيل الشباب اللي في الثلاثينيات تقريبًا أكيد مر عليهم عنوان أو أكثر من عناوين سلسلة صرخة الرعب أو Goosebumps وهي واحدة من أشهر سلاسل روايات الرعب في العالم. علشان كده كان تحويلها لسلسلة أفلام من الأمور المحسومة من حيث قدرتها على تحقيق النجاح والإيرادات.

بعد حوالي 3 سنين  من تقديم الجزء الأول، بنشوف الجزء الثاني واللي بيتم طرحه تحت إسم Haunted Halloween واللي بيتعرض في وقت الهالوين. واختيار التوقيت ده كان من أحسن الأمور اللي قام بيها صناع الفيلم علشان يستهدفوا محبي أفلام الرعب في عيد الهلع.

لكن هل الفيلم فعلًا مرعب؟ الحقيقة أن الفيلم قدر يخلط بين المغامرة مع بعض الأكشن مع شوية رعب. بحيث يقدم لنا في النهاية تجربة مشاهدة ممتعة مع كل مشهد من مشاهد الفيلم بدون شعور بالزهق. ودي من أحسن الأمور اللي بنشعر بيها مع أفلام المغامرات.

فيلم Goosebumps 2 Haunted Halloween بيحكي عن مجموعة من الأصدقاء اللي بيواجهوا مجموعة من المخلوقات المرعبة اللي بتطاردهم بالتزامن مع عيد الهالوين اللي بتكتسب فيه كل الأحداث طابع مغامراتي ومرعب.

على الرغم من صغر سن معظم أبطال الفيلم إلا أن الأداء التمثيلي بتاعهم كان جيد ومتميز، خاصة ويندي ماكليندون-كوفي وماديسون أيسمن اللي قدروا يقدموا أداء متميز وقوي.

كمان من الأمور المميزة في الفيلم بعض المشاهد الكوميدية واللي امتزجت مع المغامرة والرعب علشان تقدم في النهاية مزيج جميل جدًا ومناسب لكل أفراد الأسرة.

أما العناصر المساعدة للفيلم زي الموسيقى التصويرية والخدع السينمائية فكانت واحدة من أهم وأكبر العناصر اللي جعلت الفيلم قوي ومميز. خاصة التداخل و(التشبيك) بين المشاهد اللي أداها ممثلين حقيقيين والمشاهد اللي تم تقديمها بالجرافيك والخدع.

الجزء الثاني من سلسلة صرخة الرعب جزء قوي ومميز ومناسب للمشاهدة من كافة أفراد الأسرة في موسم الهالوين.

علشان تبقى عارف: تم تقديم الجزء الأول من السلسلة سنة 2015.