The Definitive Guide to Living in the Capital , Cairo , Egypt

أحيانًا بنشعر أن قصة الفيلم هي في الأساس مجرد خيط درامي واهي علشان يتم تقديم سلسلة من مشاهد الأكشن بلا توقف. ودي خلاصة رأينا في فيلم Hunter’s Prayer لكن لو عاوزين تعرفوا أكتر عن الفيلم تابعوا رأينا بالتفصيل في السطور القادمة.

القصة

فيلم Hunter’s Prayer بيحكي عن قاتل محترف بينفذ عملياته بدم بارد، لكنه بيتردد لما بيتم تكليفه بقتل امرأة شابة، التردد ده بيغير القصة تمامًا وبيدخل الجميع في دوامة من الهروب من القتل من ناحية، ومن محاولة اكتشاف سبب محاولة الاغتيال من الأول من ناحية تانية. لكن هل هتنكشف كل الأسرار دي؟ ده اللي هنحاول نعرفه من خلال الفيلم وأحداثه.

فريق العمل

الفيلم من إخراج  جوناثان موستو ومن بطولة سام ورثينجتون ومارتن كومبستون وأوديا راش وفيرونيكا إشيجول وألين ليش، أما التأليف فمن نصيب بول ليدن اقتباسًا عن رواية  كيفين ويجنال.

الأداء التمثيلي

نقدر نقول أن الأداء التمثيلي كان مقسوم مناصفة بين سام ورثينجتون اللي قام بدور لوكاس وبين Hوديا راش واللي قدر كل واحد فيهم أنه يقوم بالمطلوب منه بالظبط في الفيلم. وفي واقع الأمر المطلوب ماكانش كتير من وجهة نظرنا علشان مشاهد الأكشن كانت طاغية على معظم الأحداث الدرامية ماعدا بعض الأحداث البسيطة اللي تخللت مشاهد الاشتباكات والمطاردات، ودي قدر الأبطال يقوموا فيها بدورهم على أكمل وجه.

السيناريو والحوار والإخراج

سيناريو الفيلم كان مخلص لفكرة المطاردات والأكشن طوال الوقت من أول مشهد لأخر مشهد تقريبًا، وده سهل علينا كمشاهدين متابعة الفيلم لكن في نفس الوقت ممكن يعكس انطباع عند الجمهور اللي مش بيحب الأكشن بالقدر ده أن الفيلم سطحي شوية، خاصة مع بعض المبالغات في مشاهد الأكشن واللي بيتحمل الإخراج الدور الأول والأخير فيها. لكن في النهاية تصنيف الفيلم كان واضح من البداية والمشاهدين كانوا عارفين هيشاهدوا إيه بالظبط.

الديكورات والموسيقى والأزياء

على الرغم من كثرة مشاهد التصوير الخارجي إلا أن مشاهد التصوير الداخلية كانت جيدة من حيث الديكورات، لكن الموسيقى التصويرية كانت محتاجة تكون أقوى من كده علشان نشعر بانسجام كامل مع أحداث الفيلم.

الخلاصة

فيلم Hunter’s Prayer فيلم مخلص للأكشن ومشاهد الاشتباكات إلى أبعد الحدود، وهيعجب المشاهدين اللي بتجذبهم النوعية دي من الأفلام جدًا.

علشان تبقى عارف:

كانت الممثلة هالي ستينفيلد هي المُرشحة الأصلية للعب دور البطولة، ولكنها انسحبت بسبب تعارض مواعيد تصويرها في جدول مواعيدها.