The Definitive Guide to Living in the Capital , Cairo , Egypt

لو عندك حلم أو هدف في الحياة وحاسس أن فيه حاجات كتيرة واقفة بينك وبين حلمك، بنطلب منك تعيد تفكير، خصوصًا لما تتفرج على I, Tonya علشان تعرف أد إيه الناس بتحارب علشان أحلامها وطموحاتها.

القصة

فيلم I, Tonya بيحكي عن القصة الحقيقية للمتزلجة على الجليد تونيا هاردينج، وإزاي بتقرب من تحقيق أحلامها في العالم ده، لكن بعض الأحداث والتدخلات بتحاول طوال الوقت تمنعها وتعرقل تقدمها. هل هتستسلم لقدرها المحتوم ولا هتتمسك بالنجاح حتى النهاية.

فريق العمل

الفيلم من إخراج  كريج جيليسبي، وتأليف ستيفن روجرز، وبطولة مارجوت روبي وسيباستيان ستان ومكينا جرايس وأليسون جاني.

الأداء التمثيلي

كان من الواضح من أول مشهد لأخر مشهد في الفيلم المجهود الكبير اللي بذلته مارجوت روبي علشان تظهر لنا بالكفاءة والقدرة دي، مش بس في أداء المشاهد الصعبة لكن كمان علشان توصل لنا مشاعرها وإحساسها طوال الوقت، والحقيقة أن روبي نجحت ونعتقد أن النجاح ده هيرفع أسهمها في هوليوود بشكل كبير ومميز.

السيناريو والحوار والإخراج

سيناريو الفيلم جذاب وغير ممل وقدر ينقلنا من مشهد للتاني بسرعة وتشويق بحيث يفضل المشاهد متابع من البداية للنهاية، كمان الحوار الذكي والكوميدي في بعض جوانبه كان شيق وجميل وفيه تجديد بدون محاولة للأفتعال.

الديكورات والموسيقى والأزياء

ديكورات الفيلم كانت جيدة وقدرت تنقلنا زمنيًا لوقت أحداث الفيلم، كمان الموسيقى التصويرية كانت قوية وحسينا أنها عنصر من أهم العناصر المساعدة لأحداث الفيلم علشان تزيد متعتنا وشغفنا بالأحداث.

الخلاصة

فيلم I, Tonya من الأفلام الجميلة اللي هتديكم دفعة للحياة والأمل والكفاح على الرغم من المصاعب والمشاكل.

علشان تبقى عارف:

مارجوت روبي بطلة الفيلم بذلت مجهود مضاعف علشان تتعلم أساسيات التزحلق على الجليد علشان تعرف تقوم بدورها.