The Definitive Guide to Living in the Capital , Cairo , Egypt

الجزء الأول من سلسلة It كان بيحكي عن مجموعة من الأصدقاء بيتجمعوا علشان يواجهوا كيان شرير، وفي It: Chapter Two بنشوف نفس الأصدقاء، اللي بيتجمعوا تاني بس بعد حوالي 27 سنة، بس المرة دي علشان يخلصوا عليه، وده معناه إننا عارفين الإطار العام للأحداث، ومش محتاجين ٣ ساعات علشان نفهم ده من أول وجديد.

في It: Chapter Two بنعرف أكتر عن فريق “الخاسرين” بعد ما عدى حوالي 27 سنة على أحداث الجزء الأول، وبيتجمع الفريق من جديد علشان يواجه المهرج الشرير “بيني وايز” اللي قام بدوره “بيل سكارسجارد” واللي بييجي المرة دي بأستعداد أكبر، وجرعة رعب أكبر.

لو جينا نتكلم فيما يتعلق بأفلام الرعب، فإحنا بنكون عارفين الحبكة والقصة اللي بتدور فيها الأحداث، وفي الغالب كمان بنكون عارفين النهاية، إلا إن الحاجة الوحيدة اللي بتخلينا ندخل الفيلم هي انتظارنا لسلسلة لا تنقطع تقريبًا من مشاهد الرعب، اللي هي المشاهد اللي المفروض تخلينا مش عارفين ناخد أنفاسنا بشكل طبيعي من فرط الانتظار، لكن السؤال بقى، هل ده حصل في الجزء الثاني من It ؟

الحقيقة إنه حصل، لكن كان لازم نستنى وقت طويل نسبيًا من ساعة بداية الفيلم علشان تبدأ الأحداث المرعبة، ووقت أطول علشان الفيلم يرسم أيقونته والبناء الخاص به، واللي احنا أصلًا عارفينه، وده يعتبر من أهم عيوب الفيلم.

الأداء التمثيلي لأعضاء الفريق، سواء “جيسيكا شاستاين” أو “جيمس مكافوي” أو “بيل هادير” أو باقي الممثلين كان مميز، ده غير كمان اختيار الشخصيات الكبيرة سنًا، واللي خلانا نحس إنهم فعلًا نفس الأبطال الصغار في السن، كمان جرعة الكوميديا في الفيلم خلتنا نحس إن الفيلم فيه شوية نقط إيجابية تخليه يستحق المشاهدة.

باختصار.. لو عجبك الجزء الأول من الأحداث في It: Chapter Two هايبقى استمرار ناجح على نفس النهج. لو بس قدرت توقف نفسك عن الشعور بالملل نتيجة التطويل في بعض الأحداث.