The Definitive Guide to Living in the Capital , Cairo , Egypt

 مانقدرش ننكر أبدًا إن انتشار التكنولوجيا الحديثة والسمارت فون واحدة من أحسن الحاجات اللي حصلت لجيل كامل من الشباب والكبار، وخلت كل حاجه أسهل ومتاحة، سواء بنستخدمها للبحث عن معلومة، أو لحجز عربية أجرة. 

لكن فيلم Jexi بيناقش التكنولوجيا الحديثة من منطلق مختلف تمامًا من خلال قصة “فيل” اللي قام بدوره “آدم ديفاين” واللي المفروض إنه مكانش له علاقة كبيرة بالتليفونات الذكية، لكن غصب عنه هيضطر يحدث تليفونه، وهنا هيقابل تكنولوجيا المساعد الصوتي الجديدة، والمعروفة باسم “Jexi” زي “أليكسا” و”سيري” في الآيفون كده، واللي بتحاول تنظم له حياته وتديرها بشكل جديد ومختلف.

لكن مع تطور العلاقة بين الاتنين هتحاول “Jexi” تدمر حياة “فيل” وتسيطر عليها بشكل سيء، لكن ياترى إيه اللي هيحصل؟

 Jexi مش الفيلم الأول اللي يتناول الجانب المظلم للتقنية الحديثة في حياتنا، لكن المميز في الفيلم إنه بيتناولها بشكل كوميدي، بعيدًا عن السوداوية اللي كانت غالبة على معظم الأفلام اللي بتلعب في المنطقة دي، زي أفلام Her أو Ex-Machina وغيرها.

المميز في كوميديا الفيلم إنها جمعت بين الكوميديا الخفيفة والظريفة اللي تخلينا نضحك، وفي نفس الوقت خلتنا نفكر في قد إيه وسائل التواصل الحديثة مسيطرة علينا وعلى حياتنا، والفضل في التركيبة الظريفة دي يرجع لتمثيل “أدم ديفاين” وطبعًا الأداء الصوتي لـ “روز بيرن” في دور المساعد الصوتي Jexi.

ولأن “روز بيرن” سجلت صوتها على الفيلم بعد نهايته علشان تقدر تظبط انفعالاتها، “آدم ديفاين” كان بيأدي كتير من المشاهد بدون ما يسمع صوتها في ودنه بشكل حقيقي، وده يعرفنا مدى قدرته على التخيل وتوصيل مشاعره للمشاهدين باحترافية.

من الأمور اللي ضايقتنا في الفيلم هي النهاية، واللي حطت Jexi في شكل أسطوري شوية، لكن حاجة زي دي مفهومة في إطار السيناريو اللي عاوز يبين لينا إيه اللي ممكن يحصل لو الذكاء الصناعي توحش وقرر يعادينا.