The Definitive Guide to Living in the Capital , Cairo , Egypt

تقريبًا مافيش حد ما شافش فيلم جومانجي اللي يعتبر الجزء الأول من فيلمنا اللي هنتكلم عنه النهارده، وسواء كنت من الناس الأكبر شوية في السن واللي عاصروا فيلم التسعينات تزامنا مع عرضه، أو لو شوفته من خلال قنوات الأفلام بعد كده، أكيد الفيلم كان ممتع وساب داخلنا أثر قوي وجميل.

الرائع في الجزء الثاني من جومانجي إنه مش بيستغل نجاح الجزء الأول علشان يقدم حالة من النوستالجيا، لكنه بيقدم عناصر نجاح جديدة.. تفاصيل أكتر في السطور الجاية. 

القصة

فيلم Jumanji: Welcome to the Jungle بيحكي عن مجموعة من المراهقين اللي بيلعبوا لعبة الكترونية بتسحبهم لداخلها وبتغير شخصياتهم بالكامل، وبيكون أمامهم ضرورة استكمال مهمة خاصة باللعبة وإلا مش هيرجعوا لحياتهم العادية تاني. ياترى هيقدرووا يحققوا المطلوب منهم ولا هيفشلوا في لعبة جومانجي؟!

فريق العمل

الفيلم من إخراج جاك كاسدان، ومن تأليف سكوت روزنبرغ، ومن بطولة كارين جيلان ودواين جونسون  وبوبي كانافال وميس بايل وكيفن هارت وجاك بلاك.

الأداء التمثيلي

الأداء التمثيلي كان منقسم لجزئين. الأول خاص بأبطال الفيلم قبل التحول لشخصيات اللعبة، وللأسف أداؤهم كان ممل جدًا وسيء وحسينا أن وجودهم كان لاستقطاب المشاهدين المراهقين والمنتمين لفئات عمرية أصغر.

أما أبطال الفيلم الرئيسيين فكان أداؤهم مميز ومتكامل مع السيناريو والحوار واللي قدروا يقدموا أداء مثالي ومميز وده اللي هنناقشه دلوقت.

السيناريو والحوار والإخراج

في بداية مشاهدتنا للفيلم كنا نتوقع أن الفيلم هيعتمد على نجاح الجزء الأول علشان يخلي المشاهدين يشعروا بالحنين لمشاهدة الجزء الثاني، لكن الفيلم قدر يحقق عوامل نجاحه بنفسه دون الاعتماد على الجزء الأول وده من الأمور اللي جعلتنا نحترم الفيلم جدًا.

الديكورات والموسيقى والأزياء

ديكورات الفيلم كانت مميزة واستخدام الخدع السينمائية تم بحكمة واحترافية في نفس الوقت، كمان موسيقى الفيلم كانت حماسية وجميلة وكانت عارفة امتى تسيطر على المشهد وتكون عالية وامتى تنخفض  علشان تترك لما مساحة للمشاهدة والمتابعة.

الخلاصة

Jumanji: Welcome to the Jungle فيلم قوي وكوميدي وقادر على اضحاكنا واعجابنا بعيدًا عن الجزء الأول من نفس السلسلة ونجاحه.

علشان تبقى عارف:

أعلن النجم (دواين جونسون) على صفحة الفيسبوك الرسمية الخاصة به، أن (كارين جيلان) ستشارك في بطولة الفيلم.