The Definitive Guide to Living in the Capital , Cairo , Egypt

بنحب وبنشجع الأفلام اللي بتلقي الضوء على ظاهرة مهمة في المجتمعات. والحقيقة أن ظاهرة خطف الأطفال وطلب فدية من أهلهم أو بيع أعضائهم لعصابات متخصصة أصبحت ظاهرة المفروض تهز ضمير العالم كله. فيلم Kidnap  بيناقش الظاهرة دي من خلال قصته.

القصة

الفيلم بيبدأ بمشاهد افتتاحية لأم بتعمل في وظيفة متعبة علشان تحصل على قوت يومها وتقدر تصرف على أبنها الوحيد. بعد كده بتصطحبه لمنتزه علشان يقضي يوم ظريف، لكن بعد انشغالها في مكالمة هاتفية مع طليقها بتكتشف اختطاف ابنها، علشان تبدأ مطاردة طويلة ومثيرة بتبتلع أحداث ووقت الفيلم بالكامل.

فريق العمل

الفيلم اتصف بقلة عدد الأبطال، لكن قامت بالبطولة الرئيسية هالي بيري في دور الأم كارلا، وقام الطفل ساجي كوريا بدور الأبن المخطوف، وشارك أيضًا في الفيلم ليو تيمبل وكريستوفر بيري ودانا جورير وكريس ماكجين.

الفيلم من تأليف نايت والتني وإخراج لويس بريتو.

الأداء التمثيلي

العبء التمثيلي بالكامل كان على كاهل هالي بيري، واللي قدرت تقوم بالدور بشكل رائع، خاصة مع فكرة أنها معظم الوقت في سيارتها، الأمر اللي جعل كل تركيزها التمثيلي يكون بخصوص حركة عينها وتفاعلها مع الأمور حواليها، والحقيقة قدرت هالي بيري أنها تقوم بالدور بشكل مميز ومحسوب لتاريخها الفني.

ولا يمكن ننسى دور الطفل ساجي كوريا واللي قدر يقوم بدوره بشكل ممتاز، وعلى الرغم من قلة مساحة دوره نظريًا، لكن عمليًا كان له تأثير كبير على الأحداث.

السيناريو والحوار والإخراج

سيناريو الفيلم نجح في أنه يسحبنا بشكل تدريجي للأحداث. صحيح حسينا ببعض الملل في البداية، والمشهد الافتتاحي الطويل كان ممكن يتم اختصاره، لكن ممكن نسامح السيناريو على كل مشاكله في مقابل جرعة التشويق والإثارة اللي قدمها لنا بعد كده.

أما الحوار في الفيلم فكان ضعيف. وكان من الواضح أن بعض الجمل الحوارية محشورة علشان توصل المعلومات للمشاهدين. وكان نفسنا نقول للي عمل الفكرة دي أننا كمشاهدين قادرين نفهم ونستنتج لوحدنا ومش محتاجين شرح مبالغ فيه من خلال الحوار، كمان بعض الجمل الحوارية كانت مصطنعة وحسينا إنها غير حقيقية.

الديكورات والموسيقى والأزياء

الموسيقى التصويرية كانت شبه مش موجودة خلال الأحداث، وعلى الرغم من أن البعض ممكن يشعر أن ده له تأثير سلبي، لكن أيضًا ممكن يكون له تأثير إيجابي أنه جعلنا نركز بشكل مكثف مع الأحداث ونشعر بيها ونعايشها كأنها بتحصل في الواقع من حولنا. أما اختيار أماكن التصوير فكان مميز وخاصة في المشاهد الأخيرة لما بننتقل من الطريق إلى المنازل الضيفة. وقدرت الديكورات تعكس لنا مدى سوء الحالة الاجتماعية والمادية لعصابات خطف الأطفال.

فيلم Kidnap بيلقي الضوء على ظاهرة في منتهى الخطورة… استمتعوا بالفيلم.

علشان تبقى عارف:

تقييم الفيلم على موقع IMDB هو 6 من 10 وشارك في التقييم حوالي 10000 مستخدم للموقع.