The Definitive Guide to Living in the Capital , Cairo , Egypt

في كل مدرسة أو جامعة لازم نشوف شلة شباب مراهقين بيحبوا يعملوا مقالب في زمايلهم وفي الآخرين. وفي كتير من الحالات بتكون المقالب بريئة ومش مزعجة، لكن أحيانًا المقالب بتخرج عن السيطرة وبتتسبب في كوارث حقيقية. وهو ده اللي حصل لأبطال فيلم Kill Game.

Kill Game بيحكي عن مجموعة من الأصدقاء متخصصين في عمل المقالب الصعبة في الآخرين. لكن الأمور بتنقلب رأسًا على عقب لما بيلاقوا نفسهم هدف لقاتل متسلسل بيمارس معاهم ألعاب… قاتلة.

المخرج والمؤلف روبرت ميرنز ماعندوش فيلموجرافيا قوية. سواء على مستوى التأليف أو الإخراج أو حتى الإنتاج. وده أنعكس على قصة الفيلم. لأننا طوال الوقت حسينا أن الفيلم قصته مستهلكة ومكررة. وللأسف تنفيذ الفيلم على الشاشة كان هو كمان مكرر ومافيهوش جديد. وده بيخلي المشاهدين يشعروا بالملل حتى لو كانت الوسيلة الوحيدة أمام المخرج علشان يجذب المشاهدين لاستكمال الفيلم هي المشاهد الصادمة والدموية والمفاجئة.

أبطال الفيلم لورا آشلي صامويلز وبيرسون فود وجو أدلر ومايكل جالانت مايعتبروش من الممثلين المشاهير بأدوار قوية. وده له ميزة وعيب. الميزة هي أن مستوى الرعب في الفيلم بيزيد لما البطل يكون مش معروف ومش مألوف لعين المشاهد، لكن العيب هو أن مستوى الأداء التمثيلي للأبطال بيكون منخفض. لكن مين بيدور على مستوى أداء تمثيلي لما يكون كل المطلوب هو تقديم مشاهد مليئة بالصراخ ومحاولة الهروب المستمر؟!

من أهم الأمور في الفيلم هي فريق الخدع السينمائية اللي قدر يصمم مشاهد مؤلمة نفسيًا للمشاهدين ويقنعنا بتعرض الأبطال لها بالفعل وده يحسب لهم. لكن من ناحية تانية مش بنشوف إبداع إخراجي أو أهتمام بالتنويع في زوايا المشاهد أو طرق عرض اللقطات على الشاشة. وده عيب يشترك فيه الإخراج والمونتاج على حد سواء.

فيلم Kill Game بيقدم رعب تقليدي ممكن يعجب محبي أفلام الرعب اللي بينتظروا أي إنتاج جديد يروي عطشهم وخلاص، بغض النظر عن جودة العمل ده من عدمه.

علشان تبقى عارف: ميزانية الفيلم حوالي 5 مليون دولار أمريكي.