The Definitive Guide to Living in the Capital , Cairo , Egypt

أفلام كتير بتحكي عن السرقات الكبيرة، وفرق المحتالين اللي بتدبر وتخطط علشان تنفذ سرقات كبيرة وتقدر تهرب من العقاب أو ملاحقة الشرطة. علشان كده تقديم فيلم تاني بيحكي نفس القصة يعتبر مخاطرة. إيه اللي يقدر عليه صناع King of Thieves علشان يقنعونا أن الفيلم مختلف عن باقي الأفلام اللي بتتناول نفس القصة؟

King of Thieves بيحكي عن مجموعة من المحتالين الكبار في السن واللي بيقرروا ينفذوا عملية سرقة محكمة في المملكة المتحدة.

أول حاجه علشان يختلف الفيلم عن أفلام كتير في نفس الفئة هي الاستعانة بفريق عمل متميز. عندنا مثلًا مايكل كين في دور البطولة. والحقيقة أن مايكل واحد من أفضل الفنانين في هوليوود من فترة طويلة. رغم إنه مش واخد حقه بشكل كبير. ومانقدرش ننسى بعض أدواره زي دور (ألفريد) خادم باتمان ومساعده الأول في فيلم The Dark Knight رائعة المخرج كريستوفر نولان اللي قدمها سنة 2008.

كمان كين شارك في بطولة فيلم Going in Style واللي بتتشابه قصته مع قصة فيلمنا.

كمان بيشارك في بطولة الفيلم توم كورتني و جيم برودبنت والمعروف أداؤه في أعمال زي Gangs of New York وهو واحد من أجمل أفلام المخرج مارتن سكورسيزي سنة 2002.

ولو كان فريق الممثلين في الفيلم قوي ومميز. عندنا كمان مخرج من العيار الثقيل. جيمس مارش اللي قدم أعمال بقوة The Theory of Everything في 2014 والمستوحى عن قصة حياة العالم ستيفن هوكينج واللي فاز بجائزة أوسكار أفضل ممثل. غير جوائز الأكاديمية البريطانية والجولدن جلوب.

سيناريو الفيلم قوي ومترابط. وتأليف جو بينهال كان جيد وقادر يخلينا لا نشعر بالملل على مدار حوالي ساعة ونصف هي زمن الفيلم. ويقدم مغامرة مع بعض الأكشن والكوميديا اللي جعلت الفيلم أقوى وأكثر متعة في المشاهدة.

King of Thieves مش بيقدم قصة جديدة أو مختلفة. لكن تناوله للقصة المعتادة كان جيد وفيه نقاط كتير ممتعة. الأمر اللي يخلي الفيلم صالح للمشاهدة لمحبي أفلام السرقات والتخطيط والمؤامرات.

علشان تبقى عارف: الفيلم إنتاج بريطاني وتم عرضه في المملكة المتحدة في سبتمبر 2018.