The Definitive Guide to Living in the Capital , Cairo , Egypt

صناع الجزء الثاني من سلسلة أفلام (كينجسمان) عملوا أفضل شيء ممكن يعملوه. أخدوا كل حاجة لها علاقة بالجزء الأول وأعادوا تقديمها من جديد بشكل أكثر قوة واحترافية. وده في رأينا سبب كافي لنجاحهم!

القصة

الفيلم بيحكي عن تدمير مقر منظمة كينجسمان، وضرورة توحد أعضائها مع أعضاء جمعية جاسوسية تانية في الولايات المتحدة، للتصدي لخطة الشريرة جوليان مور أو (بوبي) واللي بتحاول تسيطر على العالم.

فريق العمل

الفيلم من تأليف ماثيو فون بالتعاون مع مارك فيلر، أيضًا فون تولى مسئولية إخراج الفيلم، وأسند البطولة لـ  تارون إيجرتون وجوليان مور وتشانينج تاتوم وهالي بيري وكولين فيرث.

الأداء التمثيلي

المميز في الفيلم أن أبطاله كانوا على وعي ودراية كبيرة بالجزء الأول من الأحداث، بالتالي قدروا يقدموا لنا أداء متناسب مع محبي السلسلة واللي كانوا بانتظار الجزء الثاني على أحر من الجمر. لكن جوليان مور على سبيل المثال وعلى الرغم من أسمها الضخم في عالم التمثيل إلا أن أداؤها في الفيلم كان ضعيف وفشلت في كتير من التحديتات، وحسينا أن أسمها على أفيش الفيلم تمت كتابته لزيادة القيمة السوقية للفيلم فقط. على الرغم من مساحة دورها الكبير كشريرة الفيلم بالمقام الأول.

السيناريو والحوار والإخراج

إخراج الفيلم كان محترف جدًا في إخراج مشاهد الأكشن والاشتباكات، وتم استعمال زوايا الكاميرا من جهات مختلفة علشان يقدم لنا في النهاية مجموعة من المشاهد القوية والمميزة واللي أكيد هتعجب كل محبي أفلام الأكشن بشكل عام، ومتابعي السلسلة بشكل خاص.

لكن إخراج الفيلم كان واضح فيه جدًا تأثره بعالم أفلام جيمس بوند، وخصوصًا الفترة الأولى من سلسلة الأفلام، وده كان شيء جيد في حد ذاته لأنه فكرنا فعلًا بفترة جيدة من فترات صناعة أفلام الجاسوسية.

الديكورات والموسيقى والأزياء

ديكورات الفيلم والأزياء قدرت تنقلنا زمنيًا للفترة اللي بيحكي عنها الفيلم باقتدار، وكنا متوقعين من الموسيقى نفس الإبهار لكن للأسف كانت قوية وكل حاجة لكن مش بالقوة اللي كنا متوقعينها لفيلم زي ده. وأبسط مقارنة بينها وبين الموسيقى المميزة لأفلام جيمس بوند مثلًا هتكون في صالح سلسلسة بوند بلا نقاش.

الخلاصة

لو كنت من محبي سلسلة أفلام جيمس بوند القديمة، أو من محبي سلسلة (كينجسمان) الحالية، الفيلم ده أكيد هيكون إَضافة ممتازة وهيخلق عندكم حالة إبهار ومتعة بصرية كبيرة.

علشان تبقى عارف:

تم تقديم الجزء الأول من السلسلة سنة 2014 بعنوان Kingsman: The Secret Service