The Definitive Guide to Living in the Capital , Cairo , Egypt

مش كل الأفلام بتكون نهايتها سعيدة، خاصة الأفلام الواقعية. لأنها بتعرض أحداث وقعت بالفعل. وبعض الأفلام بتأرخ لحوادث معينة، تخلي الناس ماتنساهاش. وهو ده اللي حصل مع فيلم Kursk.

الفيلم مبني على أحداث حقيقية، لكارثة حصلت لغواصة نووية روسية. اتعرضت لحادث في البحر وحوصرت في منطقة صعبة، أثناء مناورة بأسلحة غير حقيقية. (على الأقل ده التفسير الرسمي للحادث). ده بيحط الحكومة الروسية في مواجهة صعبة بين الرأي العام وأهالي البحارة، اللي عاوزين يتم إنقاذ أهلهم. وبين خوف الحكومة على الأسرار النووية في الغواصة. وعدم رغبتها في الاستعانة بمساعدة الدول التانية.

الأداء التمثيلي لأبطال الفيلم كان قوي ومميز. لكن ضايقنا في نفس الوقت النمطية الشديدة في تقديم الشخصيات. يعني كل شخصية بيتم تقديمها في القالب المحفوظ بتاعها. وكأن كل الروس مجموعة من الشخصيات العصبية المتصلبة، زي ما بنشوفهم في الأفلام الأمريكية باستمرار.

المخرج “توماس فينتربيرج” قدر يوظف كل واحد من الممثلين في مكانه الصحيح. أما الإبداع الأكبر فكان لديكورات الغواصة، اللي تم تقديمها بشكل ممتاز. ولو كان تصميم الديكورات أقل من اللي شوفناه على الشاشة، الفيلم كان هيفشل باقتدار. لأن جزء مهم من الفيلم هو توحد المشاهدين مع الحدث، وشعورهم بكل مشهد فيه كإنه حقيقي.

لو بتحبوا الأفلام المقتبسة عن قصة حقيقية، أو كنتم من اللي تابعوا القصة الحقيقية للغواصة المنكوبة، أكيد Kursk هيعجبكم.