The Definitive Guide to Living in the Capital , Cairo , Egypt

أفلام قليلة اللي بتجمع بين السياسة والكوميديا والرومانسية مع بعض في فيلم واحد. Long Shot قدر يحقق المعادلة دي. لكن عدم تركيزه على أي خيط رئيسي ومحاولة اللعب على كل الحبال أثر بشكل سلبي على الفيلم.

الفيلم بيحكي عن “تشارلز ثيرون” اللي بتترشح لمنصب الرئاسة. في نفس الوقت بتستعيد علاقتها بصديق قديم “سيث روجان”، اللي كان معجب بيها من زمان. بتحتاجه يساعدها في كتابة خطاباتها السياسية، وبتتطور العلاقة الرومانسية بينهم.

الأداء التمثيلي لتشارلز ثيرون وسيث روجان كان رائع. وكان واضح الكيمياء العظيمة بين الإتنين. كمان عجبنا رسم وكتابة الشخصيتين من “دان استرلينج” و”ليز هانا” مؤلفي الفيلم. اللي قدروا يخلطوا الكوميديا بالسياسة بالرومانسية في مزيج جيد جدًا.

أمال أيه اللي ماعجبناش؟ ماعجبناش أن الفيلم كان فاقد للهوية. مش عارف يحدد هل هو فيلم كوميدي مع خط رومانسي؟ ولا فيلم رومانسي مع شوية كوميديا؟ أو فيلم سياسي دخل فيه الكوميديا والرومانسية؟ الفشل ده في تحديد اتجاه ثابت وواضح للفيلم، خلانا مانوصلش للمنتهى في أي جزء من أجزاء الفيلم. لا ضحكنا للنهاية ولا حسينا أننا أمام عمل رومانسي رائع أو سياسي صميم.

فيلم Long Shot ينفع للمشاهدة في الويك إند بدون توقعات مسبقة، من جمهور عايز يشوف توليفة حلوة، بين الكوميديا على الرومانسية مع شوية سياسة ونكت على دونالد ترامب.