The Definitive Guide to Living in the Capital , Cairo , Egypt

توليفة الفيلم الكوميدي المرعب توليفة خاصة من الصعب إننا نلاقيها غير في أفلام هوليوود، وفيلم Mom and Dad قدر يلعب على التوليفة دي بشكل جيد على الرغم من بعض المشكلات على صعيد السيناريو.. تعالوا نتعرف على الفيلم عن قرب.

القصة

فيلم Mom and Dad بيحكي عن مرض أو هستيريا جماعية بتضرب الولايات المتحدة، وبتتسبب في تحول الأباء لكائنات عنيفة ضد الأبناء، الأمر اللي بيضع ابن وابنة في مواجهة مع أهلهم للنجاة بحياتهم في جو بيجمع بين الرعب والفانتازيا في نفس الوقت.

فريق العمل

الفيلم من تأليف وإخراج بريان تايلور، أما البطولة فكانت من نصيب نيكولاس كيدج، وأوليفيا كروتشيتشيا ولورينا دياز وجوزيف د. ريتمان وتيريزا كوك.

الأداء التمثيلي

من الواضح في الأداء التمثيلي إن نيكولاس كيدج بيحاول بكل الطرق أنه يرجع من تاني لصدارة عالم التمثيل في هوليوود. مؤخرًا تعرض كيدج لسلسلة من العقبات والأفلام والاختيارات السيئة في مشواره الفني. لكن على الرغم من اختياراته الجيدة لكن كيدج مش قادر يفهم أن المشكلة ممكن تكون بالمقام الأول في التكلفة الإنتاجية لأفلامه، في اعتقادنا إن نيكولاس كيدج -بالإضافة لتحسين اختياراته- محتاج يحسن شركات الإنتاج اللي بيتعامل معاها بحيث يقوم ببطولة أفلام فيها شوية بذخ أنتاجي علشان يخرج الفيلم بشكل لائق في النهاية.

السيناريو والحوار والإخراج

سيناريو الفيلم كان جيد على الأقل في النصف الأول من الأحداث، وقدر يجبرنا على استكمال المتابعة للنهاية بدون الشعور بالملل، حوار الفيلم كمان كان ذكي وكان فيه بعض الجمل والمواقف الكوميدية، وفي النهاية نقدر نقول أن مستوى الفيلم إخراجيًا كان جيد ويستحق المشاهدة.

الديكورات والموسيقى والأزياء

ديكورات الفيلم كانت متوسطة، أما الموسيقى التصويرية فكانت بحاجة أنها تكون أفضل بكتير، علشان تعلق في دماغنا ونشعر في النهاية أننا عاوزين نسمعها بشكل منفصل عن الأحداث، والحقيقة أن النوعية دي من الأفلام مش بتركز على الديكورات والموسيقى بقدر تركيزها على السيناريو والأحداث.

الخلاصة

فيلم Mom and Dad فيلم رعب مع لمسة كوميدية وبيحاول يوجه رسالة للأباء والأبناء على حد سواء.

علشان تبقى عارف: تقييم الفيلم على موقع IMDB وصل لـ 5.5 من 10.