The Definitive Guide to Living in the Capital , Cairo , Egypt

من أكثر الحاجات المميزة اللي بتعجبنا في أفلام الأنيميشن. أن كتير منها بيكون صالح للكبار والصغار على حد سواء. وده بيظهر من نوعية الأعمار اللي بنلاحظ أنها بتتفرج على أفلام الأنيميشن في السينما. عشق كل الأعمار لأفلام الكارتون والأنميشن بيفكرنا بالشعار اللي كان بيتكتب على مجلة سمير زماااان: (من سن 9 إلى 99)!

فيلم Monster Island من الأفلام اللي ممكن الكبار أو الصغار يتفرجوا عليه، الفيلم بيحكي عن الطفل  الصغير لوكاس، واللي بيكتشف أنه مش إنسان! الاكتشاف اللي بيقلب حياته كلها وبيدخله في مجموعة من المواقف اللي كلها كوميديا ومغامرات في نفس الوقت.

الجميل في الفيلم أنه بيحفزنا على تقبل أنفسنا، وأننا نسعى أننا نعرف نفسنا على حقيقتها أكتر ونتقبلها ونطورها في نفس الوقت، وإزاي الإنسان ممكن يستغل قدراته علشان يكون أحسن ويحقق النجاح في حياته. كل دي قيم اتعلمناها من مشاهدتنا للفيلم بشكل غير مباشر وده واحد من أفضل الأمور في الفيلم.

الأداء الصوتي لأريك لارسون وجوي كامين ويفيونا هاردينجهام وباقي أبطال الفيلم كان مميز، وكان من الواضح عليهم إيمانهم الشديد بالقصة وشعورهم بيها، الأمر اللي انعكس على أدائهم الصوتي ودي حاجة مش سهلة على الممثلين أنهم يوصلوا لنا مشاعرهم من خلال صوتهم فقط.

نظام حركة الشخصيات على الشاشة على الرغم من جودته لكن كان مختلف شوية عن اللي اتعودنا عليه من الأفلام الأمريكية عالية التكلفة الأنتاجية، كنا مستغربين شوية أسلوب التحريك ده، لكن في النهاية إحنا بنعشق التجديد، ده غير أن قوة الأداء الصوتي وباقي عناصر الفيلم ساعدت على تخطينا النقطة دي بسرعة وخلتنا نندمج في الأحداث، خاصة مع الموسيقى التصويرية القوية.

لو كنتم من محبي أفلام الأنيميشن اللي فيها قصة أو درس غير مباشر، ولو عاوزين تتفرجوا على فيلم يناسب المرحلة العمرية اللي أنتم فيها أيا ما كانت، ننصحكم في الحالة دي تتابعوا أحداث Monster Island اللي هتلاقوها قوية ومميزة وتستحق المتابعة.

علشان تبقى عارف:

تقييم الفيلم على موقع IMDB وصل لـ 4.8 من 10.