The Definitive Guide to Living in the Capital , Cairo , Egypt

على الرغم من أن عالم الموضة والأزياء ممكن ناس كتير تتخيل أن اللي بيشتغلوا فيه بتكون حياتهم بوهيمية وكلها جنون، لكن الحقيقة أن المجال ده من أصعب مجالات العمل في العالم، وبيتطلب العمل فيه جزء كبير من بذل الوقت والمجهود والتركيز الشديد والاهتمام بالتفاصيل. وعن كل الأمور دي بيحكي فيلم Phantom Thread .. تعالوا نتكلم عنه.

القصة

فيلم Phantom Thread بيحكي عن قصة نجاح أحد الأشخاص العاملين في عالم الموضة والملابس والأزياء، وإزاي بيقدر يوصل لمكانة عالية عالمية، لكن مع وجوده على القمة، بيقع في الحب وبيصبح له عشيقة، الأمر اللي بيعطله عن عمله وبيصيبه بالتشتت وعدم القدرة على العمل بنفس الشغف. هل هيقدر يختار بين الحب وبين الشغل؟

فريق العمل

الفيلم من تأليف وإخراج بول توماس أندرسون، ومن بطولة دانيال داي لويس وفيكي كريبس وكاميلا روثرفورد وليزلي مانفيل وجين بيرى وبيرن كولاكو.

الأداء التمثيلي

الأداء التمثيلي لكل الأبطال كان جيد ومميز، والإخراج قدر يبرز النقط الجيدة في الأداء التمثيلي ويركز عليها زي حركة العيون والوقفات أثناء الكلام وطريقة نطق الجمل الحوارية، والحقيقة أن كل تفصيله من تفاصيل الأداء التمثيلي تم الاهتمام بها إلى أقصى حد وده من أهم عوامل نجاح الفيلم من وجهة نظرنا.

السيناريو والحوار والإخراج

على الرغم من قوة سيناريو الفيلم لكن البعض ممكن يشعر بالملل بسبب بطء وتيرة الأحداث، لكن بشكل عام نقدر نقول أن الفيلم كان بيركز بالمقام الأول على التفاصيل الصغيرة في نظرات العيون وحركة الكاميرا وتصميم المشهد، على حساب سرعة حركة السيناريو والانتقال بين المشاهد.

الديكورات والموسيقى والأزياء

ديكورات الفيلم كانت متقنة ونقلتنا زمنيًا للفترة اللي بيتناولها الفيلم، كمان الموسيقى التصويرية وحركة الكاميرا كانت متقنة وموظفة بشكل ممتاز مع كل مشهد من مشاهد الفيلم.

الخلاصة

فيلم Phantom Thread يستحق المشاهدة، خصوصًا من أصحاب البال الرايق ومحبي السينما والأفلام اللي بتخاطب العين والوجدان والمشاعر.

علشان تبقى عارف:

تقييم الفيلم على IMDB وصل لـ 7.9 من 10.