The Definitive Guide to Living in the Capital , Cairo , Egypt

بعض الأفلام بتكون فكرتها وقصتها قوية، لكن “الاستخسار”  في الميزانية وفي التنفيذ ممكن يبوظ مجهود كبير اتبذل في صناعة الفيلم، وهو ده تحديدًا اللي احنا قدامه في فيلم Playmobil: The Movie.

فيلم Playmobil: The Movie  واللي بالمناسبة بيتعرض بإسم تاني هو Playmobil: The Missing Piece بيحكي عن مارلا (أنيا تيلور جوي) اللي بتلاقي نفسها في مغامرة شيقة ومثيرة هتدخل فيها وهي بتحاول تلاقي أخوها المختفي، لكن الحقيقة إن رحلة البحث عن الأخ مش بس بتخليها تكتشف مكانه، لكنها بتكتشف أبعاد جديدة لشخصيتها وللكون حواليها.

فكرة الرحلة اللي بتغير الإنسان بحد ذاتها فكرة كويسة، وتم تناولها في أكتر من فيلم بنجاح، لكن في Playmobil: The Movie حسينا إن السيناريو ما أخدش وقته علشان يرسم شخصية مارلا بشكل صحيح، بالتالي ما حسيناش بالتوحد معاها ولا مع أهدافها ولا مع التغير اللي هيحصل لها.

تحريك الشخصيات وطريقة الرسوم كانت كويسه وقوية، لكن طول الوقت كان عندنا إحساس إن الفيلم كان محتاج ميزانية أكبر ودعاية أكتر، واهتمام أكبر بالتفاصيل علشان يطلع بشكل ممتع، خاصةً إن مستوى الكوميديا في الفيلم قليل جدًا ودي كانت من الأمور المحبطة بالنسبة لنا.

لكن الكويس في الفيلم كان الأداء الصوتي القوي من “أنيا تايلور جوي” و”دانيال رادكليف” و”جابريل باتيمان” وباقي أبطال الفيلم. واللي قدروا بأصواتهم يخلونا نتفاعل بشكل أفضل مع الشخصيات اللي شوفناها على الشاشة.