The Definitive Guide to Living in the Capital , Cairo , Egypt

لو كنتم من مواليد أواخر السبعينات أو الثمانينات أو حتى أوائل التسعينات، ففي الغالب هتكونوا شوفتوا جزء واحد على الأقل من أجزاء سلسلة رامبو على شريط فيديو وقضيتوا ليلة من الأكشن الجميل والمميز اللي اشتهر بتقديمه العالمي “سيلفستر ستالون”.

في فيلم Rambo 5: Last Blood رامبو “سيلفستر ستالون” بيقدم رسالته الأخيرة، والعمل الأخير اللي بيختم بيه واحدة من أطول سلاسل أفلام الأكشن في العالم (١٩٨٥-٢٠١٩) وكان واضح اهتمام  سيلفستر بالفيلم بدرجة كبيرة، حتى بيقال إنه شارك في كتابة السيناريو بنفسه.

Rambo 5: Last Blood بيحكي عن رامبو اللي بيقرر يعيش اللي باقي من حياته في ولاية أريزونا، لكنه بيلاقي نفسه مضطر لمواجهة عصابات مكسيكية متخصصة في الإتجار بالبشر واللي بتخطف بنت أخوه.

من المفهوم في أفلام رامبو إن القصة مش بتكون هي أهم حاجه في الفيلم، لكن الأكشن هو اللي مهم، والحقيقة إن مشاهد الأكشن في Rambo 5: Last Blood بتاخد منحنى مختلف ومتصاعد من بداية الفيلم لحد ما بتوصل لأعلى مستوى لها في الثلث الأخير تقريبًا من الأحداث، حتى إننا نقدر نقول إن الفيلم بيقدم مستوى عالي جدًا من الدموية والعنف بشكل نادرًا ما شوفناه في معظم أفلام الأكشن لسنة ٢٠١٩.

الأجمل إن أبطال الفيلم قالوا إن حركات الأكشن في الفيلم مقتبسة بدرجة كبيرة من سلسلة أفلام Home Alone ومش هانقدر نوضح أكتر من كده علشان مانحرقش أحداث الفيلم.

من الأمور المميزة في الفيلم الموسيقى التصويرية الجميلة، واختيار الأغاني المتناسقة مع مشاهد الأكشن، كمان زوايا وكدرات ومواقع التصوير، خلتنا نسافر لرحلة ممتعة على الصعيد البصري، وكل دي حاجات ما خدتش الاهتمام المطلوب في الأفلام السابقة من السلسلة.