The Definitive Guide to Living in the Capital , Cairo , Egypt

حلوة أفلام الانيميشن اللي بيكون لها أكتر من هدف، هدف بسيط على قد عقول الأطفال اللي بتتفرج، وهدف أكبر للفئات العمرية الأكبر اللي بتتفرج على الفيلم، وهو ده اللي بيحاول فيلم Salma’s Big Wish يقدمه للمشاهدين.

فيلم Salma’s Big Wish بيحكي عن بنت صغيرة بتحاول وبتسعى طول الوقت إنها تلاقي أي أثر لأهلها اللي كل اللي تعرفه عنهم إنهم سابوها وهي صغيرة، وفي مرحلة معينة بتيأس من البحث عنهم، لحد ما بتكتشف قدرة جديدة بتخليها تقدر تعمل حاجات مكانتش تحلم بيها، إيه هي القدرة دي؟ ويا ترى هتستخدمها ازاي؟ هو ده اللي بنعرفه في أحداث الفيلم.

الفيلم بيسلط الضوء بشكل غير مباشر على مشاكل التفكك الأسري وازاي المفروض الأهل يكونوا مع أولادهم  بشكل مستمر علشان نفسيتهم تكون أفضل، وفي الحقيقة عجبتنا رسالة الفيلم اللي ممكن متكونش واضحة لكل المشاهدين، لكن هتوصل للي عاوز يدور على اللي وراء كل مشاهد من المشاهد.

مستوى الرسومات وتحريك الشخصيات على الشاشة كان للأسف ضعيف، وده ممكن يخلي الأطفال اللي بيتفرجوا على الفيلم يتضايقوا من نمط تحرك الشخصيات وظهورها على الشاشة، كمان مكانش فيه تنوع في الألوان أو تغيرات كبيرة فيها، وللأسف كمان كانت الإضاءة المنخفضة مسيطرة على جزء طويل من الفيلم وده يعتبر من أهم عيوبه.

أما الأداء الصوتي لـ “كريستينا ميليسا” و”سوزانا بايستروس” و”دينو أندرادي” وباقي أبطال الفيلم فكان جيد ومنسجم مع شكل الشخصيات على الشاشة بشكل يخلينا قادرين على المتابعة بدون ملل.