The Definitive Guide to Living in the Capital , Cairo , Egypt

الأفلام اللي بتحكي عن شخصين متناقضين تمامًا، بتجمعهم الظروف علشان يشتغلوا مع بعض مش جديدة. لكن الصراحة عمر التوليفة دي ما فشلت في إنها تضحكنا!

في Stuber بنشوف قصة الشرطي “فيك” اللي بيلعب دوره المصارع ونجم هوليود “ديف باتيستا”راللي هيعمل عملية في عينه، بتخليه مش قادر يسوق العربية بنفسه، وفي نفس الوقت بيطارد قاتل مجنون، الأمر اللي بيخليه مضطر يركب “أوبر” مع السواق “كميل نانجياني” واللي هيلاقي نفسه فجأة بيعمل حاجات لا تخطر على باله، علشان يحافظ على تقييم الـ 5 نجوم!

الفيلم كان ناقصه كيمياء بين البطليين الأساسيين، ولو كان سيناريو “تريبر كلانسي” أفضل شويه من اللي شوفناه، كان ممكن ما ناخدش بالنا من النقطة دي، لكن الفيلم بشكل عام مكتوب بحيث لازم يبقى فيه تناسق وكيمياء عالية بين الأبطال وده مكانش موجود.

لكن مش معنى كلامنا إن الفيلم مش كوميدي، بالعكس، بعض المواقف في الفيلم كانت كوميدية جدًا، وإخراج مشاهد الأكشن والمطاردات كان رائع، لكن قصدنا إن مستوى الفيلم كله وبشكل عام كان هيبقى أفضل لو كانت الكيمياء بين الأبطال أفضل من كده، وفي النهاية حسينا إننا أمام نسخة أقل في الكوميديا من فيلم “Central Intelligence”.

Stuber فيلم كوميدي خفيف.. ننصح بمشاهدته مع الأصحاب أو العيلة.