-
أوسكار إيزاكجوليان موور...
-
غموض وتشويق
-
جورج كلوني
-
في1 Cinema
Mohamed Hamdy
بيعجبنا في الأفلام المقتبسة عن قصص حقيقية، قدرتها على أنها تعطينا دروس في الواقع اللي بنعيشه اليوم، وقدرتها على أنها تضع تصرفات البشر تحت الميكرسكوب وتجعلنا نسأل السؤال: لو إحنا في نفس الموقف كنا هنتصرف إزاي؟ ده كان شعورنا مع كل مشهد من مشاهد فيلم Suburbicon.
القصة
الفيلم بيحكي عن قصة عائلة من الزنوج بتنتقل للإقامة في حي مثالي مخصص للبيض في الولايات المتحدة الأمريكية، وبيرصد كافة المشاكل الاجتماعية اللي بتحصل مع تغير التركيبة (المثالية) لسكان الحي الهادىء، خاصة مع حدوث جريمة شنيعة في نفس المنطقة.
فريق العمل
الفيلم من تأليف إيثان وجويل كوين ومن إخراج جورج كلوني وبطولة مات ديمون وأوسكار إيزاك وجوليان مور وجلين فليشلر وميجان فيرجسون.
الأداء التمثيلي
قدرت كل شخصية من شخصيات الفيلم أنها تغوص في أعماق الشخصية اللي بتقدمها على الشاشة، وده مش بيحصل بدون تدخل المخرج بشكل كبير علشان يخلق لكل ممثل من الممثلين جو خاص به وحالة سينمائية بتنعكس في النهاية على دوره وطبيعة قيامه به، وده اللي قدر جورج كلوني –لأنه ممثل بالمقام الأول- أنه يقدمه لزمايله اللي بيوجههم خلال إخراج الفيلم، وده اللي أنعكس على الأداء التمثيلي بشكل مميز.
السيناريو والحوار والإخراج
سيناريو الفيلم قدر يحافظ على لمحة من الكوميديا مع جانب كبير من الإثارة والجريمة، وبنعتقد أن الخيط الكوميدي الخفيف في السيناريو مقصود علشان الأنتقاد مايكونش لاذع جدًا للمجتمع الأمريكي اللي بيشعر بالخطر من كل المختلفين معه في اللون أو الجنسية..إلخ بينما كل المشكلات مش بتظهر غير منه هو شخصيًا، ودي في رأينا رسالة الفيلم اللي بيحاول يوصلها في كل مشهد تقريبًا.
الحوار في الفيلم كان مُركز لدرجة كبيرة، وكل جملة حوارية كان مقصود بيها رسالة قوية وتأكيد على الهدف العام للفيلم، وحسينا أن الحوار لو كان غير مباشر شوية كان ممكن يكون أفضل.
الديكورات والموسيقى والأزياء
ديكورات الفيلم والملابس قدرت ترجعنا لزمن الأحداث بجدارة، خاصة الديكورات الداخلية وتصميمات المنازل والمكاتب وأماكن العمل، أما الموسيقى التصويرية واللي كانت عارفة إمتى بالظبط تتصاعد مع الأحداث وإمتى تنخفض بالرتم الخاص بها فكانت مميزة لأبعد الحدود.
الخلاصة
فيلم Suburbicon بيشرح ويحلل المجتمع الأمريكي من الداخل اعتمادًا على حادثة تاريخية حقيقية. هيستمتع بمشاهدته الناس اللي بتحب أفلام الغموض والجريمة.
علشان تبقى عارف:
تعاون الممثلان (مات ديمون) و(أوسكار إيزاك) قبل كده في سلسلة أفلام (The Bourne Legacy).