The Definitive Guide to Living in the Capital , Cairo , Egypt

في أوائل التسعينيات استقبلت السينمات المصرية فيلم الراعي والنساء، ومن قبله شوفنا فيلم رغبة متوحشة لنادية الجندي ومحمود حميدة، والفيلمين كانوا بيناقشوا نفس القصة اللي بيناقشها فيلم The Beguiled مع بعض التغيير طبعًا. وطبعًا هم مقتبسين في الأساس عن عن المسرحية الإيطالية ”جريمة في جزيرة الماعز” لـلكاتب أوغوبيتي.

من الواضح أن ممكن رواية أو فكرة واحدة تلهم مجموعة فنانين ومخرجين حول العالم بتناولها في أعمالهم.

القصة

فيلم The Beguiled بيحكي عن فترة الحرب الأهلية الأمريكية، لما بيعثر مجموعة من السيدات والبنات على جندي تابع للجيش الاتحادي الأمريكي، وبيتم إسعافه من إصابته، ثم بيبدأ يرتبط بقصص عاطفية مع معظم الموجودين في المكان، لحد ما بيوصلوا لمرحلة التأمر ضده. لكن هل هينجحوا في تحقيق هدفهم؟ هو ده اللي هنتابعه من خلال أحداث الفيلم.

فريق العمل

الفيلم من إخراج وتأليف صوفيا كوبولا اقتباسًا عن رواية توماس كولينان ومن بطولة كولن فاريل ونيكول كيدمان وكريستين دانست مع إيلي فانينج.

الأداء التمثيلي

لما نتكلم عن ممثلين بحجم نيكول كيدمان وكولن فاريل، فإحنا بنتكلم عن أداء تمثيلي متميز وقدرة غير عادية على توصيل المشاعر بأقل قدر من الكلام، وبالاعتماد الأساسي على نظرات العيون ولغة الجسد وغيرها من أدوات التمثيل، وده اللي جعل الأداء التمثيلي لكل الإبطال تقريبًا متميز ويستحق الإشادة.

السيناريو والحوار والإخراج

إخراج الفيلم قدر يعتمد على القدرات التمثيلية لأبطاله بشكل كبير، وقدر يوظف أدوارهم بشكل رائع باستخدام السيناريو اللي بنعيب عليه إنه كان ممل وكنا محتاجين نشعر أن وتيرة الأحداث أسرع من كده بشكل كبير، لكن ضعف السيناريو عوضه الحوار القوي والمعبر في كل جوانبه واللي فهمنا كتير من دوافع الشخصيات اللي بنشوفها.

الديكورات والموسيقى والأزياء

ديكورات الفيلم قدرت ترجعنا لعصر الحرب الأهلية الأمريكية على الرغم أن مافيش حد فينا عاشها في الواقع، لكن الصور والرسومات اللي شوفناها عن الفترة دي كانت بتعبر عن نمط الحياة والملابس، وكل ده شوفناه في الفيلم من خلال اهتمام كبير بالتفاصيل ورغبة أكيدة في تقديم عمل قوي لكن ممل شوية، علشان كده بننصح المشاهدين يكون عندهم شوية صبر وطول بال أثناء مشاهدة الفيلم.

الخلاصة

فيلم The Beguiled فيلم مناسب للبنات والسيدات والناس اللي بتحب تتفرج على الأفلام اللي بتحمل وجهة النظر النسوية أو المناصرة للأنثى بشكل عام.

علشان تبقى عارف:

بحصول مخرجة الفيلم على لقب أفضل إخراج عن الفيلم أصبحت أول سيدة تحصل على اللقب ده في تاريخ مهرجان كان.