The Definitive Guide to Living in the Capital , Cairo , Egypt

في الكتاب اللي حمل إسم How the Grinch Stole Christmas واللي تم تقديمه سنة 1957  تم تقديم شخصية (جرينش) للمرة الأولى. وفي سنة 2000 جيم كاري قدم فيلم سينمائي بيحمل نفس الإسم من إخراج رون هاورد.

ومع نجاح الشخصية تقرر تقديمها في أعمال بعد كده. ويعتبر فيلم The Grinch من أحدث الأفلام اللي تم تقديمها عن الشخصية دي. والفيلم من إخراج يارو تشيني ومن تأليف مايكل لوسيور.

 فيلمنا بيحكي عن (جرينش) اللي بيعيش حياة كلها غضب وكآبة وحزن. وبيتضايق من شعور أهل القرية اللي عايش فيها بالفرح احتفالًا بالكريسماس. ومن هنا بياخد القرار بإفساد فرحة الناس. لكن هل هينجح؟ وإيه ممكن يحصل له علشان يترك الهدف الغريب اللي بيسعى له؟!

من أجمل الحاجات اللي لفتت انتباهنا في الفيلم، الأداء الصوتي المميز من شخصيات وممثلين لهم تاريخ قوي في هوليوود زي بنديكت كومبرباتش اللي بيقدم شخصية جرينش وفاريل ويليامز اللي عمل دور راوي الأحداث وغيرهم من أبطال الفيلم اللي قدموا أداء صوتي مميز وقوي ومقنع إلى أبعد الحدود.

الأمر الثاني اللي لفت انتباهنا هو طريقة رسم الشخصيات وتحريكها وتقديمها على الشاشة. والحقيقة أن الشخصيات تم تقديمها بشكل جيد وتحريكها بشكل انسيابي وجميل جدًا. وجزء كبير من الكوميديا في الفيلم كانت معتمدة بشكل أساسي على طريقة تحرك الشخصيات على الشاشة والحركات اللي بتقوم بيها طوال الوقت. وخاصة شخصية (جرينش).

فيلم (جرينش) مش بس فيلم مسلي وكوميدي. لكنه بيوصل لنا رسالة اساسها ضرورة الأبتسام والضحك والتفاؤل في كل تفاصيل الحياة. نتمنى الرسالة توصل لكل مشاهدي الفيلم مع الكوميديا والمتعة.

علشان تبقى عارف: كان الفيلم يحمل اسم دعائي له وهو (Dr. Seuss’ The Grinch) لكن تم تغييره وأصبح بالإسم الحالي.