The Definitive Guide to Living in the Capital , Cairo , Egypt

عالم السحر والعوالم الخفية، واحدة من أكتر الموضوعات اللي بتحب أفلام هوليود تتناولها باستمرار. مش بس علشان دي مساحة واسعة للمؤلفين أنهم يقدموا إبداعهم بدون حدود، لكن لأن النوعية دي من الأفلام بتجذب المشاهدين من الكبار والصغار على حد سواء وبتقدم لهم واقع مميز وجميل يعيشوا فيه ولو لمدة ساعتين فقط.

فيلم The House with a Clock in Its Walls بيحكي عن لويس اللي بينتقل للإقامة مع عمه بعد وفاة والده، لكنه بيكتشف أن عمه بيعمل في مجال السحر والشعوذة. الأمر اللي بيدخله في سلسلة من المواقف اللي مش بتنتهي الا بنهاية أحداث الفيلم.

فريق التمثيل في الفيلم والمكون من كيت بلانشيت في دور زيمرمان، مع جاك بلاك في دور جوناثان وغيرهم من أبطال الفيلم كان أدائهم مميز جدًا، لكن أكتر واحد مميز في فريق العمل كان أوين فاكارو اللي قام بدور لويس، واللي قدر يقدم الشخصية بشكل متميز وقوي جدًا.

الخدع السينمائية والموسيقى التصويرية لعبت دور مهم جدًا، وقدر المخرج إيلي روث إنه يوظفهم بشكل جيد جدًا علشان يقدم قصة جون بلاريس – اللي تم اقتباس الأحداث من روايته- بشكل جديد ومختلف، والحقيقة أن الخدع السينمائية كانت مقنعة جدًا ومختلفة ومبهرة بصريًا لدرجة كبيرة.

الجميل في الفيلم كمان أنه مش بس صالح للمشاهدة من الأطفال الصغار، الكبار كمان ممكن يحبوا الفيلم ويشوفوه كويس، لكن لازم ننبهكم أن بعض المشاهد ممكن تخوف الأطفال الصغار جدًا في السن، علشان كده لازم يشوفوا الفيلم مع إشراف عائلي.

فيلم The House with a Clock in Its Walls جميل ومميز وينفع للمة العيلة في السينما في الويك إند.

علشان تبقى عارف: الفيلم يعتبر أول فيلم للمخرج “إيلي روث” مقتبس عن عمل أدبي.