The Definitive Guide to Living in the Capital , Cairo , Egypt

أفلام
The Irishman

فيلم The Irishman: ليلة اللعب مع الكبار

The Irishman آل باتشينو جو بيشي جيمي هوفا روبرت دي نيرو مارتن سكورسيزي نتفليكس
  • آل باتشينوجو بيشي...
  • دراما
  • مارتن سكورسيزي
  • في1 Cinema
تم التقييم بواسطة
Mohamed Hamdy
قيم
قيم الآن
فيلم The Irishman: ليلة اللعب مع الكبار

بعد ما شوفنا فيلم The Irishman لاحظنا إن المشاهدين ماعندهمش رأي وسط على الفيلم، فهتلاقوا بعض المشاهدين عاجبهم الفيلم، وشايفينه أحسن فيلم في التاريخ، وبعضهم مش عاجبهم لدرجة إنهم ماكملوش الأحداث، ومشيوا من قاعة السينما أو من قدام “نتفليكس”.

في البداية نحب نقولكم إن فيلم The Irishman بيتعرض في بعض السينمات التابعة لمهرجانات السينما في العالم، وعندنا في مصر كان معروض في افتتاح الدورة الـ 41 من مهرجان القاهرة السينمائي الدولي، وتذكرته كانت مجانية، والدخول كان بأسبقية الحضور، وكان في إقبال وتزاحم كبير من المشاهدين.

لو مالحقتوش الفيلم في المهرجان، فممكن تتفرجوا عليه من خلال منصة “نتفليكس” الشهيرة، واللي انتجت الفيلم باعتبار إنه واحد من أكبر إنتاجاتها الحصرية، والفيلم بيحكي عن قصة صعود وهبوط “فرانك شيران” اللي بيقوم بدوره “روبرت دي نيرو” وهو قاتل محترف بتربطه علاقة مع المافيا الأمريكية في فترة صعود النقابات العمالية الأمريكية، والعلاقة دي بتكون عن طريق “جيمي هوفا” رئيس نقابة سائقي الشاحنات الأمريكية، واللي قام بدوره “آل باتشينو” وبتدور الأحداث في كواليس عالم مليان بالصراعات والمؤامرات.

نقدر نوصف The Irishman بإنه الفيلم السهل الممتنع، يعني على الرغم من إننا سهل نحكي القصة ونفهمها، إلا إنه الأحداث محتاجة شوية معرفة مسبقة أو مشاهدة لأفلام نقابات العمال الأمريكية، وخاصةً نقابة سائقي الشاحنات، وتاريخ جيمي هوفا، علشان نحقق أكبر قدر من الاستمتاع، لكن لو مفيش أي معلومات عن العالم ده، هاتقدروا بسهولة برده تفهموا كل الأحداث عادي، لكن بننصحكم ببعض الإطلاع لزيادة المتعة.

الأداء التمثيلي لكل أبطال الفيلم كان رائع إلى أقصى حد، بدايةً من “روبرت دي نيرو” اللي كان في أحسن حالاته، وأداؤه الأكثر قوة، ويكفي مشهد مكالمة التليفون اللي خلتنا نحس بمدى الاضطراب والمعاناة النفسية اللي بيعيشها.

وعلى الرغم من إننا شوفنا أكثر من ممثل بيقوم بدور “جيمي هوفا” لكن أداء “آل باتشينو” للدور كان أكثر من رائع، بكل العصبية والانفعال والعناد اللي بتتميز بيه الشخصية، وفي نفس الوقت بنشوف “جو بيشي” بأداء صعب يتكرر، وكانت مجرد نظراته في بعض المشاهد كفيلة إنها تخلينا نحس بالخوف منه كزعيم من زعماء المافيا.

الأداء التمثيلي بشكل عام نقدر نعتبره عودة للمدرسة القديمة في التمثيل، واللي بتلعب فيها نظرات العيون وحركات الكاميرا وكادراتها دور مهم علشان توصل مشاعر الأبطال للمشاهدين بدون حوارات كتير، وهي نوعية من الأداء النادر وجوده في السينما الحالية، وده لإن السينما الحالية بتعتمد على مشاهد الأكشن أو الحوار اللي بيشرح كل حاجة ومش بيسيب أي مجهود على المشاهد.

وعلى الرغم من إننا نقدر نصنف الفيلم في خانة أفلام الحركة أو الجريمة، إلا إنه كمان منقدرش ننكر إن كان فيه غطس نفسي في عقل وقلب كل واحد من الأبطال، وده علشان نشوف اللي أبعد من الحدث اللي بيحصل على الشاشة، ده غير مشاعر الأبطال اللي كانت واضحة وبارزة على الشاشة مع كل حدث وتغيراته طول الوقت.

تقنية De aging الخاصة بتصغير سن الممثلين، تم استخدامها باحترافية عالية جدًا في الفيلم، حتى إننا كنا مش عارفين نفرق بين المشاهد اللي تم استخدامها فيها والمشاهد العادية، وبنتوقع إن التقنية دي يكون ليها مفعول السحر على أفلام كتير في المستقبل، خاصةً مع ختم الجودة اللي حصلت عليه من مخرج عملاق بحجم “مارتن سكورسيزي”.

الموسيقى التصويرية وديكورات الفيلم كانت من أحلى ما سمعنا وشوفنا مؤخرًا، فمثلًا الموسيقى كانت متوظفه دراميًا في المشاهد بشكل مثالي، زي إننا نشوف مصدر الموسيقى التصويرية من كاسيت عربية مثلًا أو بتعزفها فرقة على المسرح.. الخ.

أما الديكورات فنقلتنا فعلاً لأمريكا في فترة السبعينات والثمانينات، بكل ما فيها من عشوائية واضطراب وسيطرة من العصابات على كل حاجة في البلد.

عجبك ؟ جرب

Casino أو Hoffa

نصيحة 360

فيلم The Irishman يعتبر فيلم متميز، لكن بلاش تخلوا أسماء الممثلين أو المخرج ترفع سقف طموحاتكم لفوق، لإن وارد إن الفيلم مايعجبكوش، ولو كان عندكم وقت تعرفوا أكتر عن فترة النقابات الأمريكية والمافيا هيكون أفضل وأمتع.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح