The Definitive Guide to Living in the Capital , Cairo , Egypt

عالم السحر والسحرة من العوالم المميزة اللي بتستهوي كتير من صناع الأفلام من كل مكان في العالم. ومن الواضح أن تقديم فيلم عن العالم ده أستهوى المخرج مايك شيرير اللي قرر يستعمل رواية أوتفريد بروبلير علشان يحولها لفيلم.. تعالوا نعرف أكتر عنه.

فيلم  The Little Witch بيحكي عن ساحرة صغيرة في السن (يادوب 127 سنة بس!) علشان كده الساحرات الأكبر سنًا بيعطوها مهلة سنة واحدة فقط علشان تحفظ كل التعاويذ السحرية وتثبت جديتها في عالم السحر. هل هتقدر تنفذ المهمة المطلوبة منها؟!

عجبنا في الفيلم إن القائمين عليه عارفين من البداية للنهاية أنهم بيقدموا فيلم خفيف صالح للمشاهدة من كل أفراد الأسرة بالتالي مش هنشوف كتير من الـ(فذلكة) أو محاولات أصطناع الجدية. كمان عجبنا المزج بين المغامرة والكوميديا من خلال  الأحداث اللي قدرت تجذبنا من بداية الفيلم لنهايته بدون شعور بالملل.

على الرغم من قوة الأداء التمثيلي لمعظم أبطال الفيلم إلا إننا مانقدرش ننكر تفرد وتميز كارولين هيرفورث في دور البطولة. وده منطقي من خلال استعراضنا لسيرتها الذاتية اللي بتظهر مشاركتها في أفلام كتير لها طابع أوروبي. لكنها أيضًا شاركت في أفلام قوية ومؤثرة زي Perfume: The Story of a Murderer اللي تم انتاجه في 2006 و The Reader في 2008. لكن الأدوار دي كانت صغيرة.

من الأمور اللي عجبتنا في الفيلم اهتمام صناعه بالموسيقى التصويرية وكرنفال الألوان اللي كان بيتنوع ويتغير من مشهد للتاني بشكل جعل عيوننا نفسها تتابع كل مشهد من البداية للنهاية بدون إحساس بالتعب ودي من الأمور اللي تحسب لصناع الفيلم.

The Little Witch فيلم جميل وخفيف عن السحر والسحرة والعالم الخفي الخيالي اللي بيجمعهم. الميزة الأكبر في الفيلم هي صلاحيته للمشاهدة من كافة أفراد الأسرة.

علشان تبقى عارف: تقييم الفيلم على موقع IMDB هو 6.2 من 10