The Definitive Guide to Living in the Capital , Cairo , Egypt

أول لما بنسمع عن جزء جديد من سلسلة أفلام The Conjuring لازم تنتابنا القشعريرة، ونفتكر واحدة من أقوى وأهم سلاسل أفلام الرعب تقريبًا في هوليوود. علشان كده توقعاتنا بترتفع ونتوقع أننا نتفرج على فيلم رعب متكامل، خاصة أنه تم التمهيد والدعاية القوية للجزء الحالي بشكل مكثفة. لكن هل نجح فيلم The Nun في تحقيق نفس النجاح اللي حققته الأجزاء السابقة من نفس السلسلة؟

الإجابة المباشرة والمختصرة على السؤال ده هي: لأ. الفيلم فشل في تحقيق نفس المستوى من النجاح. والسبب في رأينا يتمثل في أن المخرج كورين هاردي ظن أنه في مهمة سهلة، لأن الفيلم ينتمي لسلسلة أفلام رعب محققة نجاح ضخم، بالإضافة للتمهيد لأحداث الجزء الحالي الأمر اللي جعل المشاهدين في حالة رعب مسبقة قبل دخول الفيلم.

فيلم The Nun بتدور أحداثه قبل باقي أجزاء The Conjuring بفترة طويلة. وبيحكي عن جريمة انتحار راهبة شابة في أحد أديرة رومانيا في ظروف غامضة. الجريمة بتهز المجتمع الكنسي وبتسيب أثر سيء عند بابا الفاتيكان في روما. الأمر اللي بيخليه يبعت كاهن ومتدربة من الكنيسة لبحث الجريمة. فقط علشان تبدأ سلسلة من الأحداث المرعبة والشيطانية في مطاردة الجميع.

من أهم الأمور اللي فشل المخرج كورين هاردي في إرعاب المشاهدين بيها هي الديكورات والإضاءة. والحقيقة أن كان أمامه فرصة رائعة لاستخدام الديكورات من العصور القديمة علشان يقدم حالة فريدة ومميزة من الرعب. كمان استغلال الإضاءة كان سيء جدًا وظهرت الكثير من المشاهد في الظلام. الأمر اللي جعل كثير من المشاهدين ينتابها حالة من الضحك في بعض المشاهد اللي المفروض كانت مرعبة جدًا!

لكن علشان ننقل لكم الصورة كاملة لازم نقول أن بعض مشاهد الفيلم كانت مرعبة جدًا، خاصة المشهد اللي بتظهر فيه الراهبة الشريرة بشكل مفاجئ، لكن للأسف حتى المشهد ده تم حرقه في (التريلر) الخاص بالفيلم بشكل أفقد المشهد جزء كبير من قدرته على الرعب أثناء عرضه.

بالنسبة للأداء التمثيلي للأبطال نقدر نقول أن تايسا فارميجا قدرت تقدم أداء تمثيلي قوي. لكن بشكل عام مانقدرش نقول أن كان أمامنا ممثل متميز عن باقي فريق العمل لأن أفلام الرعب بشكل عام مش بيكون فيها مساحة كبيرة لأظهار مشاعر وانفعالات مختلفة عن الرعب والفزع.

فيلم The Nun وقع في فخ الاستسهال ومحاولة استغلال نجاح سلسلة قوية ومؤثرة علشان يحقق نجاح سهل وسريع، ونتوقع أن المشاهدين مش هيقابلوه بكتير من الحماس زي ما تم استقبال باقي أجزاء السلسلة. وده لازم يكون مؤشر قوي لصناع السلسلة علشان ياخدوا بالهم من الأجزاء القادمة اللي هايتم تقديمها.

علشان تبقى عارف: تقييم الفيلم على موقع IMDb هو ٥.٨ من ١٠.