The Nutcracker and the Four Realms
فيلم The Nutcracker and the Four Realms: التصوير المبهر
The Nutcracker and the Four Realms أفلام جديد في السينما ديزني ريفيو سينما سينمات القاهرة ماكينزي فوي مراجعة أفلام مورجان فريمان نقد أفلامكل فترة لازم شركة (ديزني) العالمية تقدم لنا عمل مميز من أعمالها اللي بتسحر الكبار قبل الصغار. وبتنقلنا بصريًا ونفسيًا لعالم جديد ومختلف بنقدر ننسى فيه كل حاجة وننسجم مع القصة المميزة وطريقة السرد الرائعة.
فيلم The Nutcracker and the Four Realms بيحكي عن كلارا (قامت بدورها ماكينزي فوي) واللي بتخوض رحلة سحرية في عوالم مختلفة في سبيل بحثها عن مفتاح له خصائص سحرية. وفي طريق بحثها عنه بتشوف حاجات أغرب من الخيال بتاخدها – وتاخدنا معاها – من مشهد لمشهد بسلاسة كبيرة ومغامرة أكبر.
المميز في الفيلم أن قصته مأخوذة من كتاب بقلم إي. تي. هوفمان، وتولى توم مكارثي وأشلي بويل تحويل القصة لسيناريو وحوار للسينما. والحقيقة أن النتيجة النهائية كانت قوية ومبهرة. وقدروا مع المخرج لاس هالستروم وجو جونستون أنهم يقدموا لنا مغامرة جميلة وخلابة.
لما بتدور ديزني على أبطال لأفلامها بيكونوا في الغالب من الفتيات الجميلات اللي بتظهر على وجوههم البراءة. وده كان متوفر في البطلة ماكينزي فوي، واللي قدمت أداء جيد. وماكينزي لعبت قبل كده دور في فيلم الفضاء المميز Interstellar وشاركت برضه في بعض أفلام الرعب المشهورة زي The Conjuring وفي أحد أجزاء فيلم Twilight.
بيشارك في الفيلم كمان مورجان فريمان، واللي بيظهر بشكل مختلف عن كتير من الأعمال اللي قدمها قبل كده. والحقيقة أن فريمان واحد من أشهر وأقوى الفنانين في هوليوود ولما بنشوف الفيلموجرافيا بتاعته بيكون مشاركته في كل عمل زي ختم ضمان بنجاحه وجودته.
هيلين ميرن كمان كانت من فريق العمل اللي لفتت نظرنا بشكل كبير. ونقدر نقول إن هيلين واحدة من أقدر وأقوى شخصيات هوليود سواء في عالم التمثيل وحتى في تصريحاتها السياسية والإنسانية.
عجبنا جدًا تصميم الملابس واختيارها. وتناغمت الملابس مع الإضاءة والألوان علشان تقدم لنا في النهاية سيمفونية جميلة مع كل مشهد. وطبعًا قدرت الموسيقى التصويرية تتوج الفيلم بالكامل علشان ننتقل في الزمان والمكان لعالم جميل وسحري. زي ما عودتنا ديزني دايمًا من أفلامها.
The Nutcracker and the Four Realms فيلم جميل ونرشحه للمشاهدة لمحبي الأفلام اللي بتحلق في عالم الخيال وتقدم لنا جزء كبير منه على الشاشة.
علشان تبقى عارف: الفيلم يعتبر ثاني فيلم رسومي تشارك فيه النجمة (هيلين ميرين) بعد فيلم (Monsters University) عام 2013.