Trouble
فيلم Trouble: الكلب ده اسم على مسمى
Trouble دي برادلي بيكر كارلوس بينافيجا كولبي لوبيزالمفروض إن Trouble تبقى صفة، لكن في الحقيقة ده اسم كلب بيلعب دور البطولة في فيلم بيحمل نفس الإسم، وبعد ما شوفنا الفيلم، عرفنا إن فعلًا الإسم على مسمى.
فيلم Trouble بيحكي عن كلب بيحاول يهرب من ولاد أصحابه السابقين، وفي طريق الهروب الكبير بيتعلم إنه يتحول من كلب مرفه ومتدلع، لكلب حقيقي بيعيش في الشوارع وبيواجه المواقف اللي بتواجه أي كلب شارع.
الجميل في كتير من مشاهد الفيلم هو مستوى الكوميديا الجميل، والمعتمدة على المواقف أكتر من اعتمادها على الإيفيهات، ده غير مستوى الذكاء في الكوميديا اللي بيقدمها الفيلم واللي كانت رائعة.
من الحاجات المبهرة في الفيلم الأداء الصوتي لأبطاله “دي برادلي بيكر” و”كولبي لوبيز” و”كارلوس بينافيجا” وباقي أبطال الفيلم واللي قدروا يخلونا نتخيل إن الكلاب فعلاً بتتكلم وتتفاعل مع بعضها.
موسيقى الفيلم كان فيها إبداع، وتنوع الألوان في الفيلم كان حلو وقدر يجذب العين – خاصة عيون الأطفال- وخلانا مهتمين بالمشاهدة والمتابعة من أول لقطة لآخر لقطة.
اللي ماعجبناش في الفيلم نمطية الحبكة، أو بمعنى أصح إن القصة النمطية، وتحديديًا جزئية التحول من شخص مرفه لشخص حقيقي يعتمد عليه، وللأسف ما اتقدمتش بشكل مختلف أو جديد، ونفس التيمة بنفس تفاصيلها ممكن تشوفوها في أعمال تانية كتير أشهرها في المنطقة العربية فيلم “H دبور” لأحمد مكي.