The Definitive Guide to Living in the Capital , Cairo , Egypt

شهرة كبيرة حصل عليها فيلم What Happened to Monday بين المستخدمين على مواقع التواصل الاجتماعي في المنطقة العربية، واعترض كتير منهم على تقييم الفيلم على موقع IMDB بـ 6.9 من 10 على الرغم من أن التقييم يعتبر معقول، لكن كتير منهم كانوا عاوزين يكون تقييم الفيلم أكتر من كده.. ياترى ليه؟ تعالوا نشوف.

القصة

الفيلم بيحكي عن مستقبل البشر، لما بتضطر الحكومات تفرض قيود على ولادة الأطفال بحيث كل أسرة يكون لها ابن واحد فقط، علشان كده بتقوم أسرة بتسمية بناتها السبعة بأسماء أيام الأسبوع، بحيث تخرج كل واحدة منهن يوم من أيام الأسبوع لتجنب مخالفة القوانين. لكن هل ممكن الأمور تسير بهدوء وبساطة؟ طبعًا لأ… لكن مش عاوزين نحرق عليكم الأحداث أكتر من كده.

فريق العمل

الفيلم من إخراج تومي وركولا وتأليف ماكس بوتكين وبطولة نومي راباس ووليام دافو وجلين كلوز وروبرت واجنر.

الأداء التمثيلي

نومي راباس تألقت في دور البنات السبعة، وقدرت تخلق Profile وشخصية مستقلة لكل شخصية من الشخصيات اللي قامت ببطولتها على الرغم من تعددها وعلى الرغم من أن ده بيضع عليها مسئولية وعبء كبيرين. كمان وليام دافو قدر يقدم أداء تمثيلي متميز ومختلف، وكل ده في النهاية بيدل على تميز الإخراج وقدرته على أنه يخرج أفضل ما في كل ممثل.

السيناريو والحوار والإخراج

سيناريو الفيلم كان أبعد ما يكون عن الملل، من أول مشهد لأخر مشهد، السيناريو كان قادر يجذبنا في كل مرة كنا بنتوقع فيها أن الأحداث أصبحت محفوظة وبقينا مش قادرين على التنبوء بالقادم في الفيلم. والفضل في ده يعود للحوار المميز والقوي واللي جذبنا هو كمان وجعلنا نركز مع تفاصيله علشان نقدر نفهم أحداث الفيلم.

ولازم نشيد هنا بإخراج الفيلم اللي قدر يجمع كل العناصر دي مع بعضها في النهاية علشان يقدم  لنا في النهاية فيلم مترابط وقوي.

الديكورات والموسيقى والأزياء

على الرغم من أن أحداث الفيلم بتدور في المستقبل، إلا أن ديكورات الفيلم قدرت تنقلنا بالفعل للمستقبل بكل ما هو قبيح فيه لو استمر البشر على سياستهم الحالية ونمط حياتهم الغير صحيح. الموسيقى التصويرية كمان لعبت دور مهم في الأحداث لكن في رأينا كانت محتاجه تكون أقوى وأكثر سيطرة وتأثير على الأحداث خاصة في الربع الأخير من الأحداث.

الخلاصة

فيلم What Happened to Monday فيلم عن مستقبل الأرض المظلم، و حاز على إعجاب كتير من المشاهدين في الشرق الأوسط. وننصحكم بمشاهدته.

علشان تبقى عارف:

تم تصوير الفيلم في رومانيا واستغرق تصويره بالكامل حوالي 100 يوم.