The Definitive Guide to Living in the Capital , Cairo , Egypt

لما نتكلم عن جريمة قتل بتحصل في منطقة منعزلة وطقس جوي سىء، يبقى بنتكلم عن عناصر فيلم قوية جدًا. لكن هل قوة السيناريو والإخراج وباقي العوامل، تقدر أنها تحول القصة دي لفيلم قوي؟ ده اللي هانتعرف عليه في تحليلنا لفيلم Wind River.

القصة

الفيلم بيحكي عن متعقب أثار، بيحاول يشارك في حل لغز جريمة، بتحصل في منطقة منعزلة. وفي ظل ظروف جوية سيئة. لكن مع استمراره في محاولة حل القضية، بنكتشف أن هدفه الحقيقي مش مجرد حلها، بقدر ما هو عاوز يوصل رسالة معينة لنفسه وللأخرين. ومش عاوزين نحرق عليكم القصة أكتر من كده.

فريق العمل

الفيلم من تأليف وإخراج تايلور شرايديان، وبطولة إليزابيث أولسن وجيريمي رينر وإيان بوحين ومارتن سينسماير وتيو بريونس وجوليا جونز.

الأداء التمثيلي

الأداء التمثيلي للأبطال المشاركين في الفيلم كان قوي ومتميز. وظهر على جميع أبطال الفيلم استغراقهم في دراسة أدوارهم لوقت طويل. وحالة الوحدة اللي حصلت بينهم وبين الأدوار اللي قاموا بها. حتى الأدوار الصغيرة كان لها تأثير ومساحة قوية في بناء الفيلم بشكل عام. وده شيء يحسب للإخراج والسيناريو على حد سواء.

السيناريو والحوار والإخراج

سيناريو الفيلم كان معتمد على فكرة أنه يسيب المشاهد يستوي على نار هادئة، ولا يقدم أجابات واضحة أو شافية من أول مشهد. وعلى الرغم من الزهق اللي ممكن نشعر به في بداية الفيلم بسبب الأسلوب ده، لكن مع الوقت ومع انكشاف الأجابات، حتى لو بشكل جزئي، بنبدأ نتفاعل مع الأحداث ونشعر أننا جزء منها. ومن هنا بييجي نجاح الإخراج في قدرته على استغلال لحظات قوة السيناريو، وتحويلها لماستر سين شوفناه في أكتر من مشهد من مشاهد الفيلم.

الديكورات والموسيقى والأزياء

من المميز في الفيلم الديكورات، اللي قدرت تنقلنا لمنطقة المفروض أنها وعرة وثلجية. وعكست الديكورات كل ما يمكن أنه يكون موجود في منطقة بالمواصفات دي. كمان لازم نقول أن اختيار أماكن التصوير والطقس المثلج اللي تم التصوير فيه، كلها أمور ساعدت على نجاح الفيلم. على العكس تماما من الموسيقى، اللى حسينا إنها ضعيفة ومش ملائمة للأحداث. وكانت محتاجه تكون أقوى وأفضل.

الخلاصة

فيلم Wind River بيتخطي فكرة جريمة القتل الغامضة، علشان يدور في نفسية وتفكير القائمين على التحقيق في جريمة القتل نفسها. ونرشح الفيلم للمشاهدة للناس اللي بتحب أفلام الغموض والأثارة.

علشان تبقى عارف:

تقييم الفيلم على موقع IMDB 7.9 من 10 وهو تقييم مرتفع قام به حوالي 40 ألف مستخدم للموقع.