The Definitive Guide to Living in the Capital , Cairo , Egypt

كتير من الشعوب بتتوارث حكمة عن ضرورة الحذر قبل التمني، علشان اللي بنتمناه ممكن يتحول لحقيقة، وساعتها مش متأكدين اللي كنا بنتمناه ده هيكون خير لينا ولا شر. هو ده بالضبط اللي بيناقشه فيلم Wish upon.

القصة

فيلم Wish upon بيحكي عن بنت مراهقة بيقع بين إيديها صندوق غريب ومرعب. الصندوق بيحول كل اللي بتتمناه لحقيقة على أرض الواقع. ومن هنا بتقرر أنها تستخدم الصندوق علشان تحقق كل أهدافها -اللي مش كلها أهداف نبيلة- لكنها بتكتشف بعد كده فداحة التمن اللي المفروض تدفعه علشان تحقق أمنياتها.

فريق العمل

الفيلم من إخراج جون ليونيتي ومن بطولة شيريلين فين وجوي كينج وإليزابيث روم مع ريان فيليب، ومن تأليف باربرا مارشال.

الأداء التمثيلي

فيما يتعلق بأغلب أفلام الرعب مش بنشعر أن الأداء التمثيلي اللي بيكون مطلوب من الأبطال بيكون أكتر من التظاهر بالخوف الشديد أو الفزع، ثم بتتولى المؤثرات الخاصة المهمة علشان تقدم باقي المشاهد المرعبة في الفيلم، والحقيقة أن Wish Upon مش بيختلف عن القاعدة دي، وحسينا أن الأداء التمثيلي لأبطال الفيلم كان متواضع ومش بيخرج عن اللي ذكرناه بالفعل.

السيناريو والحوار والإخراج

سيناريو الفيلم كان واضح وبسيط من المشهد الأول للمشهد الأخير للفيلم، والميزة في الموضوع ده أن الوضوح كان سبب أساسي لفهمنا الأحداث بسرعة واندماجنا في الخط الدرامي للأحداث بسهولة، لكن في نفس الوقت شعرنا ببعض الملل خاصة في الربع الأخير من الأحداث مع قدرتنا على استنتاج نهاية الأحداث وشعورنا أن ما فيش جديد ممكن نشوفه.

إخراج الفيلم قدر يوازن بين الرغبة في تقديم مشاهد مرعبة والرغبة في تقليل الاعتماد على الجرافيكس والخدع السينمائية لأقصى حد، والنتيجة في النهاية كانت مرضية للمشاهدين خاصة في الأعمار المراهقة واللي هيعجبهم الفيلم جدًا.

الديكورات والموسيقى والأزياء

ديكورات الفيلم تميزت بالوضوح وكانت مناسبة جدًا للجو العام للأحداث، كمان الأزياء والموسيقى اللي قدرت تنقلنا لجو من الرعب والترقب على مدار الأحداث، لكن في نفس الوقت الموسيقى ما قدرتش تعلق في ذاكرتنا أو تجعلنا ندور عليها بعد نهاية أحداث الفيلم، لكن بشكل عام الموسيقى في أفلام الرعب بتلعب دور المؤثرات أكتر من كونها بتقدم مساحات من العزف المنفرد على عكس الأفلام الرومانسية على سبيل المثال.

الخلاصة

فيلم Wish Upon بيقدم حالة من الرعب والإثارة تجعلنا نفكر مرتين قبل ما نتمنى حدوث شيء معين لنا أو للأخرين!

علشان تبقى عارف:

تقييم الفيلم على موقع IMDB 4.7 من 10 وشارك في التقييم حوالي 3000 مستخدم للموقع.