The Definitive Guide to Living in the Capital , Cairo , Egypt

هل سألنا نفسنا قبل كده إيه هو تعريفنا للجمال؟ هل الجمال هو جمال الشكل فقط أم جمال الروح؟ وهل إجابتنا على السؤال ده إجابة حقيقية نابعة من تفكير عميق ومصارحة مع النفس، أم أنها إجابة لزوم إننا نظهر متحضرين ونموذجيين أمام الأخرين؟!

القصة

فيلم Wonder بيحكي عن طفل صغير بيولد بتشوهات في الوجه، وللسبب ده بيجري عدد كبير من العمليات الجراحية، لكنها بتترك علامات صعبة على وجهه، ولما بينتقل لمدرسة جديدة فيها أطفال عاديين، بيبدأ يواجه الخوف والتنمر والتريقة من الجميع. هل هيقدر يتغلب على كل المعوقات دي؟

فريق العمل

الفيلم من إخراج  ستيفن تشبوسكي ومن تأليفه أيضًا، أما البطولة فكانت من نصيب جوليا روبرتس  وأوين ويلسون وجاكوب ترمبلي وماندي باتينكين وسونيا براجا وإيزابيلا فيدوفيتش.

الأداء التمثيلي

جوليا روبرتس قدرت تقوم بدور قوي ومناسب جدًا لسنها ولقدراتها التمثيلية العالية، أما البطل الحقيقي للفيلم فكان الطفل العبقري والمميز جاكوب ترمبلي، ودي مش أول مرة يعمل دور قوي ومميز، وسبق له قبل كده أنه قام ببطولة فيلم Room اللي حقق نجاح جماهيري ونقدي كبير.

السيناريو والحوار والإخراج

سيناريو الفيلم بيركز على حياة أوجي والتحديات والصعوبات اللي بتواجهه في حياته، وقدر السيناريو القوي أنه يخلينا نتعاطف معاه من البداية للنهاية، وتضافر مع السيناريو القوي الإخراج المميز اللي ركز طوال الوقت على مشاعر أبطال الفيلم واهتم بالمشاهد القريبة من الوجوه علشان يعكس لنا الحالة النفسية لكل بطل من أبطال الفيلم.

الديكورات والموسيقى والأزياء

ديكورات الفيلم كانت عادية وما حسيناش فيها بأي تجديد أو اختلاف. أما الموسيقى التصويرية والخدع والمكياج فكانت أكتر من رائعة ولا يقل دورها عن دور الممثلين أو المخرج كمان، وبنخص هنا طبعًا مكياج بطل الفيلم اللي قدر ينقل لنا حالته الجسدية والنفسية بشكل مؤثر ورائع.

الخلاصة

فيلم Wonder تجربة متميزة وقوية لكن مش بننصح بمشاهدته للناس اللي دموعها قريبة أو اللي قلبها رهيف علشان بجد هيتعبوا جدًا من مشاهدته.

علشان تبقى عارف:

تقييم الفيلم على موقع IMDB 8.1 من 10