The Definitive Guide to Living in the Capital , Cairo , Egypt

مطربين كتير قدموا أفلام سينمائية.. عمرو دياب ومحمد فؤاد وعامر منيب –الله يرحمه- وغيرهم كتير، لكن تعتبر تجربة مصطفى قمر تجربة مميزة علشان دايمًا قمر ما بينساش أنه في الأساس مطرب، وبيحاول يستغل نقاط قوته كمطرب علشان ينجح الأعمال السينمائية اللي بيقدمها.

فيلم فين قلبي من تأليف محمد راضي، وحوار رضا زايد، وإخراج إيهاب راضي، وبيشارك مصطفى قمر بطولة الفيلم شيري عادل ويسرا اللوزي، بالإضافة لمجموعة كبيرة من ضيوف الشرف هنتكلم عنهم بالتفصيل فى الفقرات القادمة.

الفيلم بيحكي عن رجل بيحب الموسيقى والغناء (مصطفى قمر)، وعايش على بيع الأدوات الموسيقية للفنانين والملحنين المشاهير، وبتستمر حياته بوتيرة هادئة ولا تخلو من بعض المواقف الكوميدية، لحد ما تحصل له مجموعة من المواقف -مش عاوزين نحرقها- علشان يلاقي نفسه متزوج من سيدتين (شيري ويسرا) وبيحاول يفاضل بين الأقرب لقلبه، ومن هنا بييجي اسم الفيلم (فين قلبي).

من أكثر الأمور الإيحابية اللي بتميز الفيلم هي الموسيقى والأغاني، وده شيء متوقع لما يكون البطل هو مصطفى قمر، كمان قمر قدر يستعين بمجموعة من أصدقاؤه علشان يظهروا كضيوف شرف زي الفنان حمادة هلال وهاني رمزي وحميد الشاعري، واللي ظهروا بشخصياتهم الحقيقية، أما محمد لطفي وعزت أبو عوف مثلًا فظهروا كضيوف شرف لكن بشخصيات غير شخصياتهم الحقيقية.

الأداء التمثيلي في الفيلم كان بيتراوح بين المتوسط إلى الضعيف، ولو كان الأداء التمثيلي بنفس قوة المزيكا والأغاني، كان الفيلم هيكون علامة متميزة جدًا في تاريخ السينما. لكن للأسف تأتي الرياح بما لا تشتهي السفن.

معلومة على الطاير: الفيلم من إنتاج مصطفي قمر!

نقطة إيجابية أخيرة عاوزين نتكلم  عليها وهي صورة الفيلم.. وهي محصلة اتحاد الديكورات مع الإضاءة وتصميم كادرات الفيلم، والحقيقية أن صورة الفيلم كانت متميزة جدًا، وكانت بتعطينا شعور عام بالجمال والراحة والرحابة، وده شيء إيجابي مش بنشوفه في أفلام تانية كتير.

علشان تبقى عارف:

الفيلم يعتبر التعاون الثاني بين مصطفى قمر والمخرج إيهاب راضي بعد فيلم (حبك نار) في عام 2004.

الفيلم كان اسمه فى البداية (لما تحب بجد) ثم تم تغييره الى (فين قلبي).