The Definitive Guide to Living in the Capital , Cairo , Egypt

السينما في العيد بتختلف دايمًا ولها رونق مختلف، وموسم عيد الأضحى 2019 فيه 4 أفلام جداد نازلة بيهم شركات الإنتاج المصرية، وإحنا في كايرو 360 هنساعدكم علشان تختاروا فيلم أو أكتر تتفرجوا عليه.

الفيل الأزرق 2

بعد نجاح الجزء الأول، الجزء الثاني بيحكي عن استدعاء الدكتور يحيي لقسم الحالات الخطرة، وهناك بيتعرف على واحدة بتلعب بحياته وحياة أسرته، وبيضطر يلجأ لحبوب الفيل الأزرق معتقد إنه هيسيطر على الأمور بيها.

الفيلم من بطولة النجم كريم عبدالعزيز، مع نيللي كريم، وهند صبري وإياد وهو مأخوذ من رواية الكاتب أحمد مراد، والإخراج لمروان حامد.

ولاد رزق 2

بعد 3 سنين من أحداث الجزء الأول من الفيلم، هيحاول الـ4 اخوات في الجزء الثاني إنهم يحافظوا على عهدهم بإنهم يبعدوا عن حياة الجريمة، لكن حصل الل غير خططهم كلها.

الجزء التاني هيكون بعنوان “عودة أسود الأرض”، والفيلم بطولة أحمد عز، وأحمد الفيشاوي، وعمرو يوسف، وأحمد داوود، وخالد الصاوي، وباسم سمرة، ومن تأليف صلاح الجهيني وإخراج طارق العريان.

خيال مآتة

عودة بعد غياب 3 سنوات للفنان أحمد حلمي، علشان ينافس في موسم عيد الأضحى بفيلم بتدور أحداثه عن مجموعة أصدقاء بيتفرقوا بعد حادث سرقة خططوا ليها، لكن بيتجمعوا ويفتكروا الذكريات بتاعتها، وهيظهر حلمي لأول مرة في دورين من زمنين مختلفين.

الفيلم بطولة  خالد الصاوي ومنه شلبي وحسن حسني وعبد الرحمن أبو زهرة وبيومي فؤاد ، وهو من تأليف عبد الرحيم كمال والإخراج لخالد مرعي.

الكنز 2

النجاح اللي حققه الفيلم في الجزء الأول خلى المنتج يسعى للجزء الثاني علشان يكمل سلسلة النجاح،  وهيواصل استمرار حكايات حتشبسوت وعلي الزيبق في عصر العثمانيين وبشر الكتاتني رئيس القلم السياسي اللي هيواجه تحديات في الشغل والحب.

الفيلم بطولة محمد رمضان، محمد سعد، هند صبري، روبي، أمينة خليل، وأحمد رزق، ومن تأليف عبد الرحيم كمال وإخراج شريف عرفة.