قلب أمه
قلب أمه: أحلى فيلم كوميدي في العيد
أفلام العيد دلال عبد العزيز سينما شيكو ضحك عمرو صلاح قلب أمه كوميديا هشام ماجدلما بنقول أحلى فيلم كوميدي في العيد أكيد ما بيكونش قصدنا أفضل فيلم كوميدي على الإطلاق. لإن الأفلام اللي بتصدر في فترة العيد بيكون لها دايمًا معاييرها الخاصة من حيث اختيار نوعية الجمهور اللي بتتوجه لهم الأفلام دي، ومعرفة إيه اللي بيكونوا بيدورا عليه وعاوزينه من أفلام العيد.قدرة الأفلام دي على البقاء والمنافسة وتكوين ذكرى طويلة المدى في دماغ المشاهد.
قلب أمه فيلم بيأتي من فريق من الممثلين بنحبهم، واتعودنا على أعمال كوميدية مميزة منهم، وقدروا يكونوا مجموعة ضخمة من المعجبين والمتابعين اللي هايتفرجوا على أي عمل لهم ينزل في أي وقت. هشام ماجد وشيكو – اللي كان معاهم أحمد فهمي قبل كده – قدروا يتركوا علامة قوية ومؤثرة بسبب الأفلام الكوميدية اللي قدموها مؤخرًا، وقدرت الأفلام دي تحقق النجاح وتجذب عدد كبير من الجمهور.
قلب أمه بيحكي عن فكرة فانتازية عن شاب عايش مع أمه (دلال عبد العزيز) اللي بتموت فجأة، في نفس توقيت تعرض مجرم مشهور (شيكو) لحادث بيتم نقل قلب الأم له، ومع الوقت بيبدأ يتكون عنده حنين ناحية الإبن (هشام ماجد)، الأمر اللي بينتج عنه سلسلة لا تتوقف من المواقف والمشاهد الكوميدية.
مخرج الفيلم عمرو صلاح استعان بفريق عمل من أشهر الوجوه الكوميدية زي بيومي فؤاد و محمود الليثي و محمد ثروت و أحمد سلطان. كل الأسماء دي قدرت تثبت نفسها الفترة الأخيرة وتقدم أعمال حلوة، سواء كانت منفصلة أو مع بعضهم كفرق عمل، وكتير منها حقق نجاح كبير ومميز.
بنعيب على الفيلم إنه بيضع كل الأبطال في مناطق ثابتة من الأداء بدون أي محاولة لسحبهم لمناطق جديدة أو تقديم نوعية جديدة من الكوميديا، لكن هو ده المعتاد من الأفلام اللي بيتم طرحها في فترة العيد وتفضيل المنتجين لعدم المخاطرة في الأعمال اللي بيتم تقديمها في الفترة دي.
لو كنت من محبي هشام ماجد وشيكو ونوعية الأفلام اللي بيقدموها، ما تضيعش وقت واحجز تذكرتك فورًا علشان تتفرج على قلب أمه.
علشان تبقى عارف:
احتفل أبطال الفيلم بالعرض الخاص لفيلمهم في سينما نايل سيتي.