The Definitive Guide to Living in the Capital , Cairo , Egypt

واضح أن توليفة أفلام عيد الفطر للفترة القادمة هتكون عبارة عن فيلم أكشن فيه مجموعة من النجوم – لازم يكون فيهم أمير كرارة- مع مشاركة بطل غير مصري مع كتير من مشاهد الحركة والمطاردات. التوليفة دي اتعملت في فيلم حرب كرموز وحققت نجاح جماهيري، وواضح أننا بنشوف إعادة استغلال للنجاح ده في “كازابلانكا”.

هل إحنا مع إعادة استخدام التيمات السينمائية الناجحة؟ طبعًا أه خاصة لو إعادة الاستخدام دي مش بتطلع لنا فيلم بنفس القصة. وده اللي حصل مع كازابلانكا اللي بيحكي عن مجموعة أصدقاء بيعملوا عمليات سرقة لسفن في البحر. وبيحققوا نجاح كبير في المجال ده لكن الأحداث مش بتمشي في نفس الإتجاه اللي المفروض تمشي فيه بالنسبة لهم. ياترى هيحصل لهم ايه؟

أمير كرارة بيقدم نفس الأداء اللي بيقدمه في المسلسلات الرمضانية وأفلامه بشكل عام. ابن البلد الشهم الجدع اللي بيناضل علشان قضية مهمة. والحقيقة أن كرارة من الوجوه اللي بتحبها الكاميرا والمجهود اللي بيبذله على نفسه ولياقته لازم نحطه في الحسبان.

غادة عادل بتقدم دور مختلف عن أدوارها السابقة وواضح فيه  الشغل اللي بتشتغله على نفسها علشان تقدم شخصيات جديدة في أعمالها. وطبعًا مشاركة نجم حريم السلطان التركي خالد إرجنتش حسينا أنه تم وضعه لسبب دعائي استثماري في المقام  الأول.

من الأدوار اللي لا يمكن نسيانها في الفيلم دور عمرو عبد الجليل في دور عرابي. وعبد الجليل من النجوم التقال اللي بيضيفوا لمساتهم من حيث الإفيهات على الشغل اللي بيعملوه. والحقيقة أن العبء الكوميدي في معظم الفيلم كان عليه وقدر يقوم بيه بشكل جيد.

إياد نصار يمكن يكون الوحيد اللي لم يعجبنا تمثيله. وحسينا أن دوره كان ممكن يتشال من الفيلم أو يستبدل بشخصية تانية. لكن في المجمل الأداء التمثيلي في الفيلم واللفتات الاخراجية الجيدة من بيتر ميمي كانت جيدة وتستحق المشاهدة.

كازابلانكا منافس قوي في أفلام عيد الفطر. ومرشح أكيد لأفضل فيلم السنة دي. لكن هيعمل إيه في مواجهة أفلام تانية جايه في السكة؟ تابعوا باقي ريفيوهاتنا لأفلام العيد علشان نعرف مع بعض.

علشان تبقى عارف: تريلر الفيلم حصد حوالي مليون و 700 ألف مشاهدة على موقع يوتيوب.